City in EPL trophy an chawi

Pathianni zana English Premier League khelhah champion thar Manchester City chuan champion lawm nan Etihad Stadium-a an mikhual Chelsea chu si khat faiin an hneh. Chelsea an hneh hnuin City hian champion trophy an chawi zui nghal. Pathianni zana inkhel dangah Brighton chuan 3-1 in Southampton an hneh a, tui let hnu lamah a vawi khat nan European Competition hmachhawn turin an tling.
City chakpuitu Alvarez
An champion chian tawh vanngin City manager Pep Guardiola chuan a player tha a awltir nual a, player naupang zawk leh khel tlem zawkte tan khelhna hun a siamsak. An player tha tam zawkin bul tan lo a, bul tan zingah hian Haaland, Kevin de Bruyne, Ilkay Gundogan, John Stones, Jack Grealish, Rodri, Bernardo Silva, Ruben Dias leh goalkeeper Ederson te tel lo vek mah se team lian, player lei nana sum seng hnem Chelsea hneh turin City player te an tha tawk lo thung.
Etihad Stadium-ah Ciry in bul an tan tha a, inkhel tan atanga minute 12-na lekah Julian Alvarez chuan Palmer siamsak atangin hmahruaina goal a thun. City hian Alvarez goal thun hi season kal mekah inelna hrang hranga goal 100 an thun tlina chiah a ni. City hian season kal meka EPL-ah goal 93 an thun tling tawh a. Inelna dangah goal 17 zet an thun tling tawh bawk.
Hma taka goal an thun hnu in City hian an mikhualte an nawr zui hle a. Goal hnih thun belh bawk mah se VAR in a hnawlsak ve ve thung. 11-naa awm mek Chelsea pawhin an si phurh sut theihna hun tha nei bawk mah se goal an thun thei lo tluan a. Team lian lakah an tlawm leh ta nge nge a ni.
Si khat faia Chelsea an hneh hnu hian mual-chhungah mipui an tlanlut chiam a, player te hruai hran an ngai hial. Champion lawma sahawk zualpui a reh hnuin City hian ropui takin champion trophy an chawi zui ta a ni.
Europa League khel tur Brighton
Pathianni zana inkhel dangah season kal meka chetha tluang tak Brighton & Hove Albion chuan Amex Stadium-a an mikhual Southampton chu 3-1 in an lo hneh. Brighton hian an tum ram thlengin an club chanchina a vawikhat nan European Competion an khel dawn. An mualah phu taka hnehna chang Brighton hi paruknaah an insawh nghet a, an hnuai chiaha awm Aston Villa tan lehpelh theih an ni tawh lo.
Brighton hian tlahniam chiang tawh Southampton hnehin, paruknaa insawh ngheh tumin tan an khawh a, an mualah an khel tha hle. Inkhel tan atanga minute 29-naah Evan Ferguson chuan Mac Allister siamsak atangin hmahruaiana goal a thun. Goal thun hmasa zawka an tan vangin phur leh inrintawkna sang zawk nen an inlan theih phah a. An tlak tawh vanga hnual em em Saints tan nawr let an har tawh lo. Brighton tan hian goal hmahruai thuntu Evan Ferguson chuan chawlhlawk hmain goal dang a thun belh leh a, si hnih faia hmahruai chungin chawlhlawk an hmang.
Chawlhlawk hnu lamah Mohammed Elyounoussi in bul an tan tha a, goal thun hmasa zawk an tang ve teh tlat. Table hnuai bera awm Saints tan hian Mohammed Elyounoussi chuan minute 58-naah goal thunin an si phurh a sut then. Southampton in an si phurh sut then bawk mah se Brighton in goal dang an thun belh leh thuai a, minute 69-naah Pascal Groß chuan Colwill siamsak atangin an goal thumna a thun a, an mikhualte nen an inkar an tizau nawn leh. Hun tawp thlengin goal dang a luh belh thei tawh lova, Brighton chuan point thum hlu tak an hmu a. Europa League khel turin an tling chiang ta a ni.
Tarlan tawh angin Brighton hi season kal mekah an khel tha tluang viau a, EPL team zingah team tlo ber pawl an ni. An chet that tluan laiin an manager Graham Potter chu Chelsea in an chhuhsak a. Potter a chhuah hnuin a chetha tluang lai chawl det mah se Roberto De Zerbi hnuaiah an chetha zui leh a. Tui let hnu lamah a vawi khat nan European Competition an khel phak ta hial a ni.
Brighton in an tawn ngai loh tawng a, Europa League an khel phak laiin Leeds United erawh chuan hun harsa zawk an tawn belh ve thung. Leeds hi West Ham lakah 3-1 an tlawm vangin tlakhniam an hnaih leh zual. Leeds hi point 31 hmuin 18-naah an awm mek a. Tlahniam lo turin Everton chetsual an chan a ngai tawh.