City in final an lut ve leh

February 4, Nilai zan khan English Carabao Cup semi-final thawh hnihna khelh zawh a ni a, Manchester City chuan an mikhual Newcastle United chu 3-1 in an hneh a, hnehna chang zawnin final an lut. Final-ah EPL table-ah an chunga awm mek Arsenal an hmachhawn ang.
Manchester hian Carabao Cup champion lai Newcastle hi an khelmual St James Park-ah si hnih faiin an lo hneh tawh a. Etihad Stadium-a inkhel leh tur an nih vangin final lut turin an dinhmun a tha vengvawng hle. Season liam ta kha kut bengin an lo khar tawh bawk nen an tan trophy hnai ber Carabao Cup trophy lak theihna hun tha an neih hlah an tum lo. Newcastle United pawhin an muala an tlawm tawhna chhang letiin City mualah hnehna chan let ngei tumin tan an khawh ve bawk.
Si hnih faia hmahruai tawh Manchester City hian chak nawn ngei tumin tan an khawh nasa bawk a, bul an tan tha a, goal pawh an thun hma hle. Inkhel tan atangin minute sarihna lekah fuh zetin an mikhualte an nawr tlang nghal a, Omar Marmoush chuan vanneihthlak ang reng tak, mawi fu siin a pet goal a, hmahruaina goal a thun. Hma takah goal an thun vangin Pep Guardiola team te an phur viau a, inrintawkna sang zawk nen an inlan a, an khel pawh a hmuhnawm zui hle.
Goal an chhuah hnuin Newcastle United in an si phurh sut tumin tan an khawh nghal chat a, hlauhawm an siam nghal. City si nghak James Trafford chetthat vangin an huntha an chhawr tangkai thei lo. James Trafford hian Joe Willock leh Anthony Gordon te goal thun tur tha zetin a dang a, an team a chhanhim.
Newcastle in an hun tha neih an hlah zawn hnuin City an che fuh a, goal an thun zui leh. City hian fuh zeta an khingpuite an nwar let hnuin Semenyo cross hlauhawm tak chu Newcastle defender in a dang per a, ball per hi goal hmahruai thuntu Omar Marmoush chuan minute 29-naah awlsam takin a tauh goal a, an goal hnihna thunin, an hmahruaina a tizau.
Si belh khawmah si li fai ngawta an hnufualtawh vangin Newcastle United dinhmun a chhe tak zet tawh a, an tan chuan City lehthal ngaihna a awm tawh lo a ni ber mai. Dinhmun tha taka ding tawh City in an duhtawk mai lova,goal thun belh tumin thapui an chhuah zui zel.An khingpuite chetsual vangin hun tha an nei zui leh a, counter attack an chhawr tangkai zui leh. City tan hian Tijjani Reijnders chuan Semenyo khalh remsa chu hnaite atangin a pet goal a, minute 3-2 naah an goal thumna thunin, an hmahruaina a tiza leh zual a. Si thum faia hmahruai chungin chawlhlawk an hmang.
Chawlhlawk hnu lamah Newcastle United in an si phurh sut ngei tumin tan an khawh a, hlauhawm pawh an siam thuai. Second half tir lamah penalty hlawhchhuak ngei turah in ngai mah se an hlawhtling zo lo. Penalty pek an ni loh vangin an player leh an coach te an lawm lo hle. Mak ti taka an awm laiin City in annawr let ve thung a, chiang taka Newcastle tlarhnung thiatin goal thun theihna hun remchang tha zet mai an nei. Mak tak maiin an hun tha neih hi an hlah tlat thung a, Marmoush chuan hattrick siam theihna hun tha a chhawr tangkai zo lova, goal an thun belh thei lo.
City in goal an thun belh theih loh laiin Newcastle tan hun tha a inherchhuak a, goal an thun ve ta nge nge. Fuh zeta mualneitu City an nawr tlang hnuin Anthony Elanga chuan fuh zetin a hmawr a bawk. Elanga hian pui zeta a khalh tlang hnuin minute 62-naah mawi zetin a pet kual lut a, goal ropui thunin an si phurh a sut then. He goal hian beidawng leh lungngaia kun tawh Newcastle a fuih phur a, chakna thar a pe.
Newcastle hi phur thar viau mah se Manchester City an hlauhawm zui viau thung. Bench atanga lut Erling Haaland chuan hun tha nei zawnin, pet chhe lem lo viau mah se si nghak Aaron Ramsdale chuan pui zet zetin a lo dang a, an team mualpho lutuk tur a hliahkhuh thei hram a ni ber mai.
Inkhel hmuhnawm takah goal a luh belh lova, City chuan an mualah 3-1 in hnehna an chang. City hian first leg-ah 2-0 in hnehna an lo chang tawh bawk a. Si belhkhawmah 5-1 ngawtin hnehna an chang a.Champion lai Newcastle United lakah awlsam taka hnehna changin final an lut. Final-ah season kal meka team chetha tak Arsenal an hmachhawn zui leh dawn.
Carabao Cup 2026 final hi March ni 22 khian Wembley Stadium-ah khelh a ni dawn. Team lian pahnih City leh Arsenal intum tur hian ngaihven a hlawh hle ngei ang.