January 19, Ninga zan khan English Premier League khelh chhunzawm niin, Tottenham leh Manchester City an inhmachhawn. An mahni khelmual; Etihad Stadium ah ngei inlan Manchester City chuan chawlh-lawk hmaa si hnih an phurh an sut zo lova, 4-2 a hnehna chang letin point thum hlutak an hmu. City lakah an tlawm leh tak vangin Tottenham manager Antonio Conte hma lam hun tur a chiang lo leh zual a, Conte hian ban a tawk thuai lo ang tih a sawi theih ta lo.
-- Advertisement --
City an nguai, Spurs an phur
EPL a an inlan hnuhnung berah an hmelma lian Arsenal hneh lo Tottenham Hotspurs chu EPL champion lai Manchester City lakah huaisen takin an inlan a. Chawlh-lawk hmaa goal hnih an thun hman vangin an phur viau. Hetihlai hian chawlhlawk hmaa si hnih phur hman City erawh an nguai viau a, an mahni tantute pawhin an auel nasa hman viau bawk.
City leh an mikhual Spurs te hi an inhnehtawk viau a, goal pawh a lut lawk thei lo. Ball chang tam zawk leh hlauhawm siam tak zawk ni chungin City in goal an thun thei mai lo. Bet zawka tang tam zawk Spurs hi chawlhlawk dawn hnaihah an chefuh a, inhnaihchilh takin goal hnih an thun. Minute 44-naah Dejan Kulusevski chuan minute 44-naah hmahruaina goal a thun a. Minute 45+2 ah Emerson Royal chuan Tottenham goal hnihna a thun belh zui leh cheu a, si hnih faia hmahruai chungin Spurs in chawlh-lawk an hmang.
Danglamna thlentu Mahrez
Si hnih phur chunga chawlh-lawk hmang a, hnual taka khelmual chhuahsan Manchester City in chawlhlawk an hmang tangkai a, second half tha tha zawka rawn kir in, goal li lai an thun ta hial. An mikhual Tottenham an hneh theih nana kawng pawimawh tak sial a, danglamna thlentu chu Riyad Mahrez a ni a. Mahrez hian goal hnih a thun.
Chawlhlawk hnu lamah tho-thang tha taka inlan City tan hian minute 51-na lekah World Cup-ah Argentina champion puitu Julian Alvarez chuan goal a thun a, an si phurh a sut then. Hma taka goal an thun hian inrintawkna leh phurna thar a pe a, goal an thun belh leh thuai.Alvarez goal thun atanga minute hnih hnu lekah Erling Braut Haaland chuan Mahrez siamsak atangin goal a thun a, an si phurh a sut zo. City a zawm tirha goal thun pup pup Haaland hian tunhnai game thumah goal a thun lova, hei vang hian sawisel a tawk hman hial. Spurs lakah goal a thun leh ta hian inrintawkna thar pe in, goal thun a chhunzawm chhoh ngei a beiseiawm.
City leh Spurs in goal hnih ve ve an thun hnuin Pep Guardiola team City in game an thunun chho ta viau a, Antonio Conte team ten chet ngaihna an hre tawh meuh lo a ni ber. Goal hnih thun zawn City an phur lak lawha goal pawh an thun zui leh thuai. Minute 63-naah Rodri siamsak atangin khel tha tak Mahrez chuan hma an hruai letna goal a thun. Hma an hruai letna hi vawnhim ngei tumin City in tan an khawh a, Tottenham in thapui tak meuh meuhin an si phurh sut an tum bawk nen inkhel a hmuhnawm hle. Spurs in an si phurh sut tuma tan an khawh laiin hun tawp dawn tep minute 90-naah Mahrez bawkin goal a thun zui leh a, an hmahruaina tizau in, an chakna a nem nghet. Tichuan, hun tawp thlengin goal dang a luh belh thei tawh lova, City chuan 4-2 a an mikhual Tottenham lehthalin point thum hlu tak an hmu a, hmahruaitu Arsenal nen an inkar an tizau.
Champion lai City hian khelh 19 atanga point 42 hmuin pahnihna an luah nghet a. Hmahruaitu Arsenal nen an inkarah point 5 a tla zep mek a, Gunners ai hian vawikhatin an khel tam zawk thung.
Pathianni zanah an hmelma lian Arsenal an hneh loh hnuin Tottenham chuan Manchester City an hneh lo zui leh a, hun khirh tak an tawng mek. Spurs hian khelh 20 atanga point 33 chauh an hmuh vangin an dinhmun a tha lo hle a, an elpui lian te aia an khelh tam zawk vek vangin an dinhmun a duhawm lo lehzual. Spurs hian hnehna chang a, kawngdik an zawh thuai an nih loh chuan an manager Antoni Conte hian ban a tawk thuai tura ngaih a ni.