City leh Inter in quarter-final an lut

March 14, Thawhleh zan khan UEFA Champions League last 16, second leg khelh chhunzawm a ni a. Premier League champion Manchester City leh Italian Serie A club lian Inter Milan ten an khingpuite ve ve pal tlangin quarter-final an lut.
City in RB Leipzig an sawp
EPL champion Manchester City chuan Germany-ah 1-1 a an inhnehtawkpui tawh RB Leipzig chu Etihad Stadium-ah an mikhual am an mikhualte hi 7-0 ngawtin an lo sawp a,awlsam takin quarter-final an lut. RB Leipzig lakah hian City forward Erling Braut Haaland chuan goal nga ngawt a thun a, Norway forward hian record thar pathum ngawt a siam rual thawt.
RB Leipzing muala chak zo bik lo City hian an mualah chak ngei tumin thapui an thawh a, inkhel tan phat atangin na takin an mikhualte an nawr nghal. An hun tha an hloh zawn hnuin minute 22-naah handball vangin penalty an hlawhchhuak. He penalty hi Erling Haaland chuan awlsam takin a pet goal a, hmahruaina goal a thun. Haaland hian UCL-ah penalty vawi ruk pet tawhin a la pet goal vek a, penalty-ah hnuhma tha a neih belh zel.
Haaland goal thun atanga minute hnih hnu lekah Kevin de Bruyne chuan goal kham a pet per a. Ball per let leh hi Haaland chuan hnaite atanga tauh goal in an goal hnihna a thun. Inhnaih chilh taka goal an thun vangin City an phur a, inrintawkna sang zawk nen an mikhualte an hmachhawn zui theih phah. Haaland leh Gundogan ten an hun tha an hlah hnuin Haaland tan vanneihna ni a herchhuak leh nawlh. Minute 45+2-ah Reuben Dias tauh tha tak chuan goal post a per hnuin mak takin a virchhuak a. Haaland hian hnaite atanga pet goal in an goal thumna a thun a, hattrick a siam chungin chawlhlawk a hmang.
Chawlhlawk hnu lamah City an khel tha chhunzawm zel a, goal pawh an thun leh thuai. Second half tan atanga minute lina lekah Captain Ilkay Gundogan chuan box chhung atangin goal a thun a, an hmahruaina a tizau. Gundogan goal thun hnu lawk hian Haaland a inlar zui leh zat a. Hattrick siam tawh Haaland hian minute 53-naah kawh zet-a pet goal in an goal ngaa a thun.
Goal li thun tawh mah se Haland-a’n a duhtawk mai lova, goal thun thei bik a nihzia lantir nan minute 57-naah a mimal goal ngana a thun zui leh zat bawk, Haland goal nga thun leh Gundogan goal khat thun hmangin City hian 6-0 in hma an hruai reng a. Hun tawp dawn hnaih minute 90’+2 naah Kevin de Bruyne chuan an chak chian lehzualna goal thunin a tawp a khar. An mualah 7-0 a chak City hian si belhkhawmah 8-1 in hnehna an chang a, quarter-final an lut.
Record pathum siam kawp Haaland
RB Leipzig lakah goal nga ngawt khungtu Erling Braut Haaland khan record thar pathum a siam rual thawih a. Record pathum a siam te chu; UCL a goal 30 thun tling rang ber, UCL-a goal 30 thun tling thei naupang ber leh Manchester City player zingah season khata goal 39 thun tling thei hmasa berte an ni.
Haaland hian RB Leipzig lakah goal hnih a thun khan UCL-ah goal 30 a thun tling chiah a. Champions League (UCL) ah goal 30 thun nan game 25 chiah a mamawh. UCL-ah goal 30 thun nana game mamawh tlem ber ni thin chu Ruud van Nistelrooy a ni a, United leh Real Madrid forward hlui Nistelrooy hian goal 30 thun nan game 34 zet a mamawh thung. Record thar siamtu Haaland hian goal UCL ah goal 30 thun nan Nistelrooy aiin game 9 zetin a mamawh tlem zawk. UCL-ah goal 30 thun rang zual pathumte chu; Haaland (25), Nistelrooy (34) leh Robert Lewandoski (46) te an ni.
Champions League-ah goal 30 a thun tlin hian Erling Haaland hi kum 22 leh ni 236 chauha upa a ni a, UCL-ah goal 30 thun thei naupang ber niin PSG forward Kyllian Mbappe record a khum. UCL-a goal 30 thun thei naupang zinga pathumna chu kum 23 leh ni 131 a upa ni chunga goal 30 thun tling Lionel Messi a ni ve thung.
Champions League-ah a ruala record pahnih ngawt a siam bakah Haaland hian Manchester City record a siam tel bawk a. City player awm tawh zawng zawng zingah season khata goal thun tam ber thar a ni a, season a la tawp lo chungin goal 39 a thun tling der tawh. Haaland hian City record kum 94 chhung zet lo ding tawh Tommy Johnson siam chu a rawn khum ta a ni.
Haaland hian season kal mekah City tan inelna hrangah vawi 36 khelin, goal 39 a thun tling der tawh. Premier League-ah game 26 atanga goal 28 thunin top-scorer a ni mek a. Champions League-ah vawi game ruk atanga goal 10 thunin top-scorer a ni mek bawk. UCL ah hian goal thun tam lamah a hnuai chiaha awm chu goal 7 thun tawh Kylian Mbappe a ni a. Quarter-final lut zo lova an tlak tawh vangin Mbappe hian goal a thun belh tawh dawn lo. Haaland hian EPL-ah goal 20 thun tling rang ber record a lo siam tawh a. EPL ah season khata goal thun hnem ber record siam tumin tan a khawh zui dawn a. Alan Shearer record khum turin Haaland hian game 11 khelh hmabak an la neihah goal 7 thun a la mamawh
Game khatah record pathum ngawt siam a, ropui taka inlan Haaland hian a goal thun thin dan chungchanga a sawi zui a. Pet tumna nei lawk sa renga pet a nih ngai loh thu a sawi teh tlat. “Goal chhunga pet luh ngei tumin ka pet deuh pawp zel” a ti a. Tum lawk nei ngai lo angin insawi bawk mah se, a goal thun tam tak erawh goal ropui leh fing tak a ni tlat thin lawi. Goal thuntu ropui ni tur renga khuanu duan a ni mahna le!
Inter Milan pawh an tlang
Thawhleh zana inkhel dangah FC Porto leh an mikhual Inter Milan te chu goal awm lovon an inhnehtawk a. An intawn hmasak tumin Serie A club lian Inter Milan in an mualah si khat faia an chak chhawr tangkaiin Inter Milan hian si belhkhawmah 1-0 in an hnehna an chang a, quarter-final an lut.