Congress nge i huphurha ZPM?
Ka bialah chuan Congress, ka huphurh lo ve ve a. Mahse, ka bialah chuan tlema rawn lawr tura ka ngaih chu Congress tho tho an ni. A chhan chu unit tha tak, block tha tak an la nei vek a, member-ah ni se mithiam leh mi changkang, mihlun an la tam.
ZPM te chu beidawng kalkhawm vek an nia, PC beidawng kha ZPM-ah an awm tlangpui, Congress sorkar leh ring lo, MNF duh bawk lo kha ZPM-ah an awm. Tin, MNF atanga kan sorkar hmasaka phur em em, kan sorkar loh chhung ruling loh nih hreh ho, Congress a chhuak ta beidawng leh tawh, MNF-a luh leh hreh tawh kha ZPM-ah an awm. Chuvangin, ka sawifiah thiam dan zawngah chuan PC beidawng, MNF beidawng, Congress tlem azawng beidawng ho zawng zawng kha beidawngpa kaihhruaina hnuaiah an awm a, sorkar-na kha an chelh theih ka ring lo va, a ni tawp mai.
Pu Duhawma pawh beidawng pa kan tihawmzia chu amah a insawi tlat a. Kan policy min an la dawngsawng thiam lo a nih chuan, a nih a, opposition ni leh tur chuan ka peih tawh lo. Thingtlanga mi chhuata mu leh tur chuan ka upa lutuk tawh ka bang daih ang, a ti a, chuvang chuan mi beidawng a ni.
Tin, Kohhranho hi pastor-te evangelist-te hi kan chatuan kawng min kawhhmuhtute an ni. An kaihhruai chu drug addict te, hur ngawl vei te, rukruk chingte kan ni. Mahse, chatuan kawng min kawhhmuhna kawngah Nilai zan June 25 ruahpui vanawn sur karah pawh an inkhawm ngat ngat ho hi an beidawng ngai lo.
Chutiang bawk chuan politician ho hi kan level a sang emaw a hniam emaw village level, block, district, state level-ah, national level thlengin midangte harsatna kara chhawm chhuak tura inpe kan nia, kan beidawng ngai lo. Pu Duhawma lo hi beidawng ka la hre lo reng reng khawvel politician-ah hian, thliarkar te takte thlengin ka la hre lo, ka beidawng ti hi…
-- Advertisement --
Ka beidawng tia a sawina chu i chiang si a?
Hrechiang e, hei i ngaithla duh em ni? A chiang lutuk tah hian, ka peih tawh lo, kan upa tawh ka bang daih ang a tia ni. Chuvangin beidawng hruaina hnuaiah hian khawiah mah beiseina tlang an lawn liam dawn lo hrim hrim. Chu chu a ni tawp mai, a theih loh.
Chief Minister Pu Zoramthanga hi…?
Kan leader hi House-a ka sawi ang kha a nia, miin sawichhe eng ang mah se la, kum 48 ka zui tawh, second khat pawh chawl miah lovin. Political party leader reng reng chu eng ramah pawh, eng hnamah pawh leader-a innghat fai vek an ni. Kan leader hi a tha ber e, a famkim e, sualna a nei lo ve ka ti miah lo, tumah mihring perfect kan awm miah lo.
Mahse, a thil tumah a chiang, vision fel tak a nei a ni. A vision hi tipuitling vek se Pathian kan mamawh miah lovang thunga na, vision tipuitling hi khawvelah mihring pakhatmah an la awm lo. A vision kha ngil takin a thlira min kalpui a ni, chutiang mi chu a ni.
Tin, khawvel suahsualna dai ngai miah lo, kum 48 ka zui chhung hian a tlinlohna te, a fellohna te, a famkim lohna te, midang aia a chungnun bik lohna te pawh sawi dawn ila ka sawi thei teuh ang kei pawh hian, tichung chuan a tawp thlenga zui tlak a ni tih hi ka finding a ni. Ruihtheih thilah meizial, kuhva, sahdah a ti ngai lo reng reng.
Tin, ama mimalah hian min eng nge an dem, a thusawi a um pha lo an tih fo hi, kan pu hrim hrima hi a hmelma te, India nena kan indonaah pawh kei pawh commander in min tirchhuaktu a nia, instruction fel tak min pe thin, kan tihtur te, mahse, a hmelah a lang ngai lo, a tilang ngai lo.
Mi harsa tanpui tur pawhin state pa ber a nia an pan vek, mi mangang kha tanpui thei lo mah se la, hma lam eng a lo thlirpui ziah a ni, chu chu a thusawi a umpha lo an tih thinna chhan hi a ni.
Hma lam êng sawi ila, a aia thim lo sawi se, an haw ang a, an depression ang a, an inawkhlum der ang chu. State pa chuan hma lam eng a lo sawipui dawn lo em ni?
Pu Rintluanga chu mi thuawih a ni an tia, ramhnuai awm lai pawhin an hotu ten ko se la, a rualin tukverh pathumah a dak hman an ti hial a?
Discipline-a tleirawl atanga hrual kan ni a, kan ram leh hnam tana thih ngam lu pua zalenna sang ber nei tura kan fight laiin mahnia tihhlawhtlin theih a ni lo tih ka chiang em em.
Khatah khan ka ngaihdan kha a lal ber dawn lo tih ka pawm em em, ka pawm avang khan democracy hi ka ngaisang em em a, ka ngaihdan, duhdan chu eng level-ah pawh ka thawlh lut ziah, mahse, ka ngaihdan min min tawmpui loh avangin ka thawhpui lo miah lo, ka ngaihdan a tlang tawh loh chuan ka pawm mai a ni. Ka phur leh ber mai.
MLA te hi ka beisei thin a, 1988 atangin kan VC tan a, MLA nih te hi ka tum lo hrim hrim a, ka qualification pawh ka hria a, VC tawk velah ka inngai a, mahse, Dampa bialah hian campaign in kan kal a, Phuldungseiah khuan 1997 ah khan kan campaign naah ka nupuia pu fanu football tournament a ni a, chief guest-ah min ruat a, thu ka sawi kha MLA-ah min awt a, ka nuih a za lutuk, ka rilru zawng zawngin ka zak. 1998 kan inthlanga kan thawhhona a tlu a, Pu J. Lalthangliana a tling a ni, kum khat leh a chanve hmain a chhuak a, khata tang khan min lo au ta a ni. Kum 2001 kum vel atangin a ni a, kum 2003-ah chuan do zawh rual lohin khua zawng zawng atangin za tel an lo kal a, mikhual ka ngah lai berin mikhual 101 ka nei a ni.
Mahse, kum 2003-ah Pu J. Lalthangliana a lo lut a, a bial ngaiah a lo lut a, ka lâng ta a, Pu J. Lalthangliana ka campaign pui leh mai a, kum 2008-ah ka ding a, ka tla thung a. Ka enkawl zui char char a, kum 2013 ah ding ngei ngei tura ngaih ka nia, Pu Liansuama a lo ding leh a, a tla a, ka enkawl tlang leh a, kum 2018 ah vote 1,657 in ka chak ta a, awm veah ka inngai.
Ka mizia zawng zawng, kum 20 chhunga khua 33 khuan an hre lutuk, zankhat tal riah lohna ka nei lo. Mi’n min sawi chhe mah se, a awm alawm an ti anga vote-ah a danglam vak chuang lovang. Ka bial mite ah khuan zan khat thil thua tlin theih a ni lo reng reng.