City leh Real inchinfel zan

Zanin dar 11:15 atangin UEFA Champions League last 16 – second leg khelh tan a ni dawn a, zanin hian Manchester City leh Real Madrid an inching fel ang a. Chelsea leh PSG, Arsenal leh Bayer Leverkusen te inkarah chak zawk tihchian a ni dawn bawk.
City hmabak a hautak
English club lian Manchester City chuan Etihad Stadium-ah si thum phur sain La Liga club lian Real Madrid an mikhual dawn. City hian an mualah hnehna lian chang a, inlehthalna lian an thlentir a nih loh chuan trophy lian pali lak kawp an tumna tihthlawna awmin, champions league atangin an tla hang nalh ang.
City hian Santiago Bernabeu-ah beisei an phak lo viau a, si thum ngawt phur chungin an haw. Si li lai phur tur zawk an ni a, Real Madrid tan Vinicius Junior chuan penalty a thelh. Penalty hi theh lo se quarter-final lut chiang tluk an ni hial dawn a. Etihad stadium-ah lehthal an nih hlauh phei chuan penalty an thelh hi an ui thar hle ngei dawn a ni.
Real Madrid laka an mualphi hnuin City hi English Premier League lamah beisei an phak lo chhunzawm a, tlahniam thei dinhmuna ding mek West Ham United nen 1-1 in an inhnehtawk ringawt. West Ham laka an chak zawh loh vangin City in Premier League-a champion an tumna a chuai deuh sawlh a, Arsenal nen point 9 zeta an inthlauh tawh vangin an hmabak a hautak hle tawh. City hian Real Madrid lehthal ngei tumin tan an khawh dawn a, an chak let thei a nih chuan UCL-ah hnuhma ropui an hnutchhiah ang a, inlehthalna lian tak an thlentir a ni ang.
Chelsea an tla tawh em?
Manchester City ang thoin London club lian Chelsea dinhmun a chhe viau tawh bawk a, si thum phur sain Stamford Bridge-ah champion lai Paris St-Germain an mikhual dawn. Arsenal midfielder hlui Samir Nasri chuan PSG in Chelsea an hneh chiang tawh thu a puang a, PSG a lawmpui thu a sawi tel nghe nghe. Nasri hian Stamford Bridge-ah pawh Chelsea tlarhnung ten PSG tlarhmate an dan theih a ring lo hle a ni.
Arsenal engtin?
Champions League-ah champion tura rinkai ber ni chungin Arsenal chuan Bay Arena-a an khingpui Bayer Leverkusen an hneh zo lova, 1-1 in an inhnehtawk. Mimualah hnehna chang zo lo mah se an tlawm bik loh vangin Arsenal dinhmun a chhe hran lova ngaih a ni. An mualah chak theihna hun tha nei bawk mah se Leverkusen lakah an chak zawh loh vangin Opta supercomputer chuan Arsenal hi Champions League-a champion turin a ring zo tawh lova, champion tura rinkai berah a dah tawh lo. An mualah hnehna changin Gunners hian mi rinna hlawh ler thar leh ngei an tum ang.