February 11, Pathianni zan khan English Premier League khelh chhunzawm a ni a. Manchester khaw club pahnih Manchester City leh Manchster United ten hnehna an chang a, EPL ah champion tuma inumna boruak a nung thar leh zual. City hian Etihad Stadium-a an mikhual Aston Villa chu awlsam takin an lo hneh a. Elland Road-a leng lut United pawhin hun tawp dawna goal hnih an thun hmangin Leeds United an hneh ve bawk.
-- Advertisement --
EPL champion lai Manchester City hian hmahruaitu Arsenal nen an inkar tizim turin an mualah chak an mamawh. Arsenal in Everton an hneh loh hnu lawk khan an inkar tihzim theihna hun tha City hian an chhawr tangkai zo lova, Tottenham lakah an tlawm ve leh ringawt. Inrinni zan khan Arsenal an chak zo lo leh a, Gunners hnaih theihna hun remchang an neih nawn leh hi City hian Aston Villa hnehin an chhawr tangkai ta nge nge a, an inkarah point thum chiah a tla zep tawh. Nilai zan hian City leh Arsenal hi an intum zui nghal dawn a, hmahruaitu an hneh thei a nih chuan City hian champion nawn leh theihna hun tha an nei zui ang.
Etihad Stadium-a an mikhual Villa lakah City in bul an tan tha a, goal an thun thuai. Inkhel tan atanga minute lina lekah Rodri chuan chep tak kar atangin a pet goal a, City hmahruaina goal a thun. Hma taka goal an thun hnuin City an hlauhawm zui viau a, chawlhlawk hmain goal hnih an thun belh leh hman. Minute 36-naah Erling Haaland siamsak tha tak chu Ilkaay Gundogan chuan awlsam zetin a pet goal a, an goal hnihna a thun. Gundogan goal thun hnu lawkah Jack Grealish chuan inhnial theih takin penalty a hlawhchhuak. He penalty hi rin loh takin Riyad Mahrez-an a pet teh tlat a. Mahrez hian chiang zeta pet goal in an goal thumna a thun a, si thum faia hmahruai chungin chawlhlawk an hmang.
Chawlhlawk hnu lamah City goal thun khawl Haaland hmuh tur a awm tawh lova, hliam vangin a inlan zui thei lo. Haaland a inlan zui theih loh bakah Arsenal hmachhawn zui tur an nih vangin Pep Guardiola chuan a player tha thenkhat a awltir bawk. An that dan berin inlan lo mahse an khel a hmuhnawm zui viau a, goal erawh an chhuah ve thung. Villa tan Ollie Watkins chuan minute 61-naah goal thunin an si phurh a sut then. Goal dang thun belh tumin an mikhualte nawr viau mah se an hlawhtling zo tawh lo. Inkhel a tawp a, Manchester City chuan 3-1 a hnehna changin point thum hlu tak an hmu.
Tarlan tawh angin City hian nilai zan hian inkhel pawimawh tak an hmachhawn zui dawn a, hmahruaitu Arsenal zanlai dar 1:00 ah an inkhel dawn. Emirates Stadium-a Arsenal an hmachhawn hunah hian an forward pawimawh Erling Haaland an chhawr thei ngei dawn em tih a chiang lo. Mimualah Arsenal an hneh hlauh a nih chuan City hi EPL hmahruaitu thar an ni thei dawn a. City hi an tlawm a nih chuan vawi khata khel tlem zawk chungin Arsenal hian point rukin hma an hruai fal thung dawn a, an inhma-chhawn tur hi inkhel pawimawh tak a ni ngei dawn.
United leh Rashford an kal zel
Pathianni zana inkhel ngaihven hlawh dangah Manchester United chuan manager nghet nei lova awm mek Leeds United an hmachhawn a. Elland Road-ah Rashford leh Garnacho te goal thun hmangin point thum hlu tak an hmu a, champion tumin hma lam an pan zel.
Table hnuai lama awm mek Leeds United hi an manager Jesse Marsch-an a chhuahsan hnuin an khel a hmuh-nawm zawk teh tlat a, an mikhual United lakah pawh an tang leh thei viau bawk. Team lian laka point hmuh theih an beiseina erawh an puitlin thei ta lo thung.
Inkhel hmuhnawm takah hian chak tura rinkai zawk Manchester United pawhin goal an thun thei mai bik lo. Ball chang tam leh hlauhawm siam tam zawk ni chungin goal an thun thei bik lova, Leeds tlarhnung inrem fuh tak leh tlawm pumpelh tuma thih thaa tanga an khingpuite an paltlang hleithei lo. Beisei anga hmaah goal thun thei bik lo mahse, hun tawp dawn hnaihah goal hnih thunin Red Devils hian si hnih faiin hnehna an chang ta tho thung.
Arsenal leh City te nen an inkar tizim tur chak mamawh Manchester United tan hian minute 80-naah Marcus Rashford chuan Luke Shaw siamsak atangin hmahruaina goal a thun. Rashford hi World Cup hnu lamah a khel tha tluang hle a. United tan a khelh hnuhnung vawi 15-ah goal 13 zet a thun tawh a. World Cup hnu lamah bik EPL ah amah aia goal thun hnem an awm lo. United hmahruaina goal thuntu Rashford hi United manager Erik ten Hag chuan Europe a forward tha ber ber zinga mi a nih thu a sawi.
Dr Rashford goal thun hnu lawk hian United an che fuh nawn leh a. Argentina rawlthar duhawm Alejandro Garnacho chuan minute 85-naah goal thunin an hmahruaina a tizau a. Goal dang a luh belh tawh loh vangin United hi si hnih faiin an chak zui ta a ni.
United hian vawi 23 khel tawhin, point 46 an hnu a, pathumnaah an awm mek a ni.