Europe khawmuala football club te inelna sang ber UEFA Champions League 16 chu zanin zanlai dar 1:30 ah khelh tan a ni dawn a. French champion Paris St-Germain leh German champion Bayern Munich te inkhel tur chu inkhel ngaihven hlawh a ni a. Italian Serie A champion AC Milan in EPL club lian Tottenham an mikhual tur pawh inkhel hmuhnawm a nih ngei a rinawm bawk.
Milan ah Spurs
English Premier League a khel tha lo, table-ah pangana luah mektu Tottenham chu Milan khawpuiah zinin Serie A champion AC Milan an hmachhawn dawn. San Siro Stadium-a inhmachhawn tur Milan leh Tottenham te hi tunhnaia khel tha lo ve ve an ni a, UCL ah insiamthat an tum dawn. Serie A champion AC Milan hi inelna hrang hranga an khelh hnuhnung vawi sarihah vawi khat chiah an chak. Tottenham pawh an khelh that lai a ni bik lo. Inelna hranga an inlan hnuhnung vawi ngaah vawi thum ngawt tlawm zawkah an tang. Inrinni zan khan Leicester City lakah 1-4 ngawtin an tlawm nghe nghe a, UCL hmachhawn turin tun hi an tan hun tha a ni hran lo.
AC Milan leh Tottenham te hi inelna hrang hrangah vawi li an inhmachhawn tawh a, Spurs vawihnih an chak laiin Milan hian Spurs lakah chak an la nei lo a, vawi hnih an inhnehtawk tawh thung. Milan leh Tottenham hi an tualchhung league ve ve ah pangana an ni dun mekin, beisei angin hma an sawn thei lo. London club Tottenham tan an si nghak Hugo Lloris leh an player pawimawh Ryan Sessegnon leh Only Lloris and Ryan Sessegnon te hliam vangin an inlan thei dawn lo. Milan team lian AC Milan hi an dam that lai a ni a, hliam vanga player chawl an awm loh lai a ni. AC Milan an hmachhawn hunah hian an club tana goal thun hnem ber Harry Kane chu Tottenham player pawimawh a ni ngei dawn a. Rafael Leao chu AC Milan innghahna lian a ni ve thung ang.
Tottenham manager Antonio Conte hian AC Milan lakah record tha tak a nei a, a team enkawlin Milan an hmachhawn hnuhnung vawi kuaah vawi riat ngawt a chakpui. Kum 2023-14 hnu lamah a vawikhat nana UCL Last 16 khel tur Milan hian Conte enkawl team Tottenham hi lo hneh an tumruh hle ngei ang.
-- Advertisement --
Champion leh champion
Paris khawpuia Parc des Princes khelmualah inkhel hmuhnawm tak a awm dawn a, an rama champion ve ve Paris St-Germain leh Bayern Munich an inhmachhawn dawn. PSG leh Bayern hi champion tura rinkai ve ve an ni a, last 16 ah an intum nghal a, pakhat zawk zawk an tlak a ngaih vangin an intum hma mah mah tiin a ngaih theih.
PSG leh Bayern Munich te hi inelna hrang hrangah vawi 11 an inhmachhawn tawh a, an pahnih inkarah PSG an chungnung zawk ret a, vawi ruk chak zawkah an tang tawh. Bayern Munich hian vawi nga lai PSG an hneh tawh a, inhnehtawk an la nei lo. PSG hian player tha tak tak neiin an squad an thuam chak viau tawh a. UCL last 16, first leg-ah a vawikhat nan Bayern Munich hneh theih an inring hle ngei ang. Anni team lian pahnih hi an khelmualah an hnuhma tha an nei tha dun viau a. An khel-muala inkhel an hmachhawn hnuhnung vawi rukah tlawm an nei lo ve ve.
PSG player pawimawh Kylian Mbappe chuan hliam vangin Bayern Munich a hmachhawn thei dawn lo tih a chiang tawh a. Lionel Messi pawhin Germam champion a hmachhawn thei ngei dawn em tih a la chiang lo bawk. PSG in Mbappe leh Messi an chhawr thei lo a nih ngat chuan Bayern tan chak theih beiseina a sang thar viau ngei ang.
Bayern tan hian an forward pawimawh Sadio Mane pawh hliam vangin a chawl mek a. Mane bakah hian an si nghak tha zet Manuel Nuer pawhin PSG a hmachhawn theih hmel loh bawk. Hetihlai hian hliam vanga chawl Dayot Upamecano chuan PSG a hmahchawn thei tawh dawn thung.
Champions League last 16 thawhkhatna hi nilai zan lai dar 1:30-ah khelh chhunzawm a ni dawn a. German club Borussia Dortmund in Chelsea an mikhual ang a. Club Brugge in Benfica an mikhual ve bawk ang