City winger thar Doku

Premier League champion Manchester City chuan winger thar an nei thuai dawn a, kum 21 mi Jeremy Doku chu an la lut fel thuai dawn.
Manchester City leh Rennes hi Belgium winger Doku manah £55.4m in an inrem a. Doku hian thawhlehni khan Manchester a pan zui nghal a. Medical test a hmachhawn zawh hunah City a zawm fel nghal tura ngaih a ni. City winger thar ni thuai tura ngaih Doku hian Ligue 1 club Rennes tan Ligue 1-ah vawi 92 khelin goal 12 a thun tawh. Belgium tan Euro 2020 leh World Cup 2022 khan a lo khel tawh bawk. EPL club lian West Ham, Tottenham leh Chelsea te pawhin an ngaihven a, City zawm a thlang a. Al-Ahli pana chhuak Riyad Mahrez hmun ruak a luah ang.
City hian nipui bazar inhawng mekah player pahnih an la lut fel tawh a. Chelsea atanga an lak luh Mateo Kovacic leh RB Leipzig atanga an lak luh Josko Gvardiol te hi player tha, an mamawh tak an ni a. An player thar ni leh thuai tur Doku pawh hi an chhawr tangkai viau a rinawm.
City in player pathum an lak luh lai hian an forward pawimawh Riyad Mahrez chuan Saudi Pro League club Al-Ahli a zawm a, an captain Ilkay Gundogan pawhin Barcelona a zawm ve bawk. Heng bakah hian .Al-Nassr nen Spain defender Aymeric Laporte chungchangah inremna an nei tawh a. Portuguese full-back Joao Cancelo pawhin Barcelona a zawm fel ve tep tawh bawk. Chhuak awm bawk mah se an mamawhna hmunah an mamawh player thar la lutin an squad an thuam chak ve zel bawk.
Champion lai City hian season tharah inkhel vawi hnih an hmachhawn tawh a, hnehna chang ve vein pahnihnaah an awm mek. An manager Pep Guardiola chuan treble champion nih nawn leh a inrin tawh loh thu a swi a. Treble champion em an ni lo a nih pawhin EPL champion ni nawn leh turin rin an kai viau thung.