Civil Hospital nau neihna thuamtha

Rogi Kalyan Samiti (RKS) sum nuai 95.40 hmanga Civil Hospital Aizawla nau neihna hmun (Labour Room leh Maternity Ward) thuamthat chu Nilaini khan chief minister Lalduhoma’n a hawng.
Infant Mortality Rate (IMR) hi ram hmasawnna thlen chin min hrilhtu pawimawh a ni tih chief minister hian a sawi a. IMR hniam ram chu ram him, chenna atana ram ralmuanga ngaih a ni, tiin, IMR tha kan neih theih nan sawrkar laipui chuan nu nau hring turte chu damdawi in emaw sub centre ah emaw nau nei thin turin a duh a, hmalakna pawh a kalpui nasa tih a sawi.
“Chutianga ti te chu nau neih lawmman a pe hial thin a. Nau piang hlim thihna, nu nau chunga boral an tlem deuh deuh theih nan damdawi ina nau hring tura kan inzirtir rual hian, kan damdawi in leh kan nau neihna hmunhma kan thuamthat ve zel a ngai a. Aizawl mipui tana pan awlsam leh lun, Civil Hospital-a nau neihna hmun tihchangtlun a ni hi a lawmawm hle,” a ti.
RKS Governing Body chairman Nazuk Kumar chuan Maternity Ward leh Labour Room-a thawktute thawhrim zia leh taimak zia a mit ngeiin a hmu a. Hmunhma tha zawk leh hmanraw changtlung zawk an mamawh hle tih a hriatpui avangin, RKS Governing Body chuan nau neihna lam hi a theih chin china thuamthat an titlu a, a lo puitling ta tih a sawi a ni.
Obs & Gynea head of department Dr Catherine Ngurbiakveli sawi danin, thlatin an nau neihna hmunah hian nau 320 an chhar ziah anga chhut a ni a. Anmahni pantu tumah damdawi in danga kal turin an tir ngai lo. Tuna an nau neihna hmunhma tihchangtlunna bultumtu RKS Governing chairman, Aizawl bawrhsap chungah an lawm hle tih a sawi.