CJP dintuin education minister bân phutna huaihawt tum

Online-a Indian thalai pawl dintu, ni rei lo te chhunga follower maktaduai tam tak nei tawh chuan a movement zuitute chu education minister leh Prime Minister Narendra Modi duh lohna lantir nan kawtthlera chhuahtir a tum thu a sawi.
Cockroach Janta Party (CJP) hian India-a mihring cheng tluklehdingawn 1.42 zinga a zahve aia tam, kum 30 hnuai lamte tan politic, hna nei lo leh thi man sang chungchanga au chhuahna kawng a hawng a. A dintu, US-a awm, Abhijeet Dipke-a chuan a bik takin tun hnaia exam zawhna put leh final-year school exam-a mark pek sual chu zirlai maktaduai tam takte hma lam hun tichhe theitu a ni a, chu chu a ngaimawh hle tih a sawi.
Dipke-a chuan X-a a mi mal account-ah, “Education minister bân phut turin India-ah ka kir leh dawn,” tiin Delhi-ah muanawm taka an thil phut tilang tura intawh khawm huaihawtnaa ‘danpui hnuaia kan dikna chanvo hmanga sorkar atanga chhanna dil tura tel turin’ thalaite chu a sawm a ni.
Education Minister Dharmendra Pradhan-a bân phutna petition-ah zirlai 8,00,000 velin hming an ziak tawh tih a sawi bawk.
CJP thang chak tak hi kum 12 chhunga Modi-a thuneihna duh lohna online-a lantirna lian ber zinga mi a ni a, tun hnaia state inthlannaah hnehna chang mah se a hmel a tichhe thei niin mi thiamte chuan an sawi hial tawh a. Iran indona nena inkaihhnawiha tuialhthei man sang leh gas tlakchham vanga lungawi lohna awm mek zel nen pawh a inzul hle a ni.
Party hming hi India rama judge sang ber, Supreme Court-a Chief Justice Surya Kant-a’n thalai hna nei lo thenkhat chu ‘chukchu’ nen tehkhina a sawina atanga chhuak a ni a. A hnuah Kant-a hian thalaite sawisel a tumna a ni lo tih sawiin, ‘degree lem’ neitute a sawina a ni tih a sawi a. He party hian Instagram-ah follower maktaduai 22 chuang a nei tawh a Dipke-a hi kum hnih kalta chhung khan US-ah a khawsa tawh a, a chhungte leh a thiante chuan a lo haw hunah man a nih an hlau hle tih a sawi a. “Eng chen nge hlauhna nen kan dam theih ang?” a ti.
Sorkar laipui chuan CJP X account chu a block a, Dipke-a chuan hacker hriat lohte hnen atanga an party Instagram page pawh thunun tura a lak let leh tawh thu Reuters a hrilh bawk.
Cabinet minister hlun tak, Kiren Rijiju-a chuan CJP chu hmelma lian ber, Pakistan leh ‘anti-India gang’ (India dodaltu pawl) hnen atangin social media-a follower zawngah a puh a, Modi-a erawh chuan engmah sawi a la nei lo.
India-ah hian thla hmasa khan undergraduate medical course-a entrance test neiha zawhna put a awm avangin thalai tam tak an thinrim a, sorkar chuan postal department hmang lovin Indian Air Force chu tun thla chhunga test neih leh turah zawhna phur turin a ti hial a ni.
CJP hian thalaiten hna thawh tur an vân pawh a ngaih pawimawh hle a. Sorkarin a chhinchhiah dan chuan kum 15 leh 29 inkar nikuma hna nei lo chu 9.9% a ni a, hna thawk rual, hna nei lo awm zat, 3.1% aiin a let thum aia an tam zawk a ni.