Clasico hnehtu Real leh bawk!

Pathianni zan Spanish La Liga inkhel pakhat El Clasico-ah mualneitu Real Madrid chuan title race-a an elpui lian ber Barcelona lakah 3-2 hnehna changin, tun season league Clasico hmasa zawkah pawh an lo chak tawh a; ti hian, league table-ah Carlo Ancelotti team Real hian point 11-in anmahni hnaihbertu Barca lakah hma an hruaifal ta a, season kal laia league khelh ruk chiah awm tawhah an title hloh hnu lakir leh turin beiseina an kham sang zel.
Bernabeu inkhel ngaihven hlawhah hian karliamta Thawhlehni Champions League-a an mikhual Paris St Germain laka 4-1 ngawta tlawm Catalan team-in Europe club inelna lian bera an tlak chhanglet turin bul an tan fuh hmasa a; tan atanga minute rukna lekah Raphinha siamsak atangin Andres Christensen chuan mikhual hmahruaina goal a thun.
Vinicius Junior chuan Real siphurh sutin half time-ah goal khat ve ve thunin team pahnih an intluk phawt.
Second half-ah pawh Nou Camp club bawk chefuh hmasa zawkah tang lehin Fermin Lopez chuan Barcelona hmahruai nawnna goal a thawh a; Lucas Vazquez-a’n Madrid siphurh a sut hnuah goal a luh belh mai ta lo a; hun pekbelh minute khatna a kal mek laia Jude Bellingham-a goal hmangin mualneitu team-in El Clasico hnehna an chang hram a ni.
England mihang midfielder Bellingham hian season kal lai inelna hranghrangah a club thar Real Madrid tan goal 21 a thun tling ta a; Real innghahna dang Vinicius pawhin season kal laiah La Liga goal 13 a khawl tling ve ta bawk.
An kawtkai hnehna nen chhiar telin season kal lai inelna hrang hranga match 28 an khelh tawhah Real an la tlawm lo tluang zel a; heti zatah hian vawi 22 chak tawhin, draw vawiruk an nei a; an khelmuala an tlawm hnuhnunber chu nikum April ni 8-a Villarreal an hneh loh daih tawh kha a ni.
Lei fuh Bellingham khan nikum October thla khan Real tan Clasico-ah goal a lo thun tawh bawk a, Nou Camp remchan loh laia Barca mikhual thlenna pakhat Estadio Olímpico Lluis Companys-a 2-1 hnehna an chan tumin Spanish giants chakna goal hnih a thawh.
England midfielder hian Spain leilunga a debut season a hmang tha chhunzawm ngat ngat a; Pathianni zan Bernabeu inkhel lian hun tawp dawna mualneitu team chakna goal a khung leh hmangin Real player zinga La Liga El Clasico khelh hmasa vawihniha goal thun ve ve thei zingah a hming a nemkai a, kum 2007-a vul Ruud van Nistelrooy hnu lama chutiang ti leh thei hmasaber a ni zui ta nghe nghe.
Nikum nipui thawt laia Real-in Bellingham man atana Borussia Dortmund hnena euro maktaduai 103 (£88.5m) an chhunluh kha an la inchhir loin a rinawm a, an legend pakhat Zinedine Zidane-a number five an pe pawh an inchhir lem lo ang!
La Liga kal laia goal 17 a thun tawh hmangin Bellingham hi he division-a goal khung hnember dawttu a ni mek a, a tluk loh awmchhun Girona player Artem Dovbyk lakah goal khatin a hniam a; season kal laiah La Liga leh Champions League double-pui thei turin a pawimawhna a sawrchhuak kal zel.