Clean note policy inhrilhfiah

Pawisa note leh a thir tha chauh hman a nih theih nana Reserve Bank of India ruahmanna siam dan chu Khawzawlah inhrilhfiah a ni.
District Consultative Committee (DCC), District Level Review Committee (DLRC) leh District Level Security Committee (DLSC) Khawzawl chu an chairman, district bawrhsap K Lalrohlua hoin Ningani khan an thukhawm a. An district chhungah pawisa thir (coins) a len tam theih nan bank hrang hrang hmalak dan tur ruahman niin, pawisa thir hi tualchhungah a tam chuan thil man tih hniam kawngah pawh nghawng a neih beisei a ni tih sawi a ni.
Reserve Bank of India-in ‘Clean Note Policy’ a siam chungchang pawh sawi a ni a. He policy hnuaiah hian mipuiin pawisa (note leh coins) tha an neih theih nan, pawisa tha tawk lote chu bank-ten mipui hnena pe chhuak loin RBI hnenah an thehlut zel dawn a ni.
Thutkhawmah hian October – December 2023 quarter chhunga Khawzawl district-a bank hrang hrang hnathawh thlirlet a ni a, hmachhawp an neih leh hma lak zui dan tur sawi ho nghal a ni.
Bank hoin sum an vawn dan (currency management), mipui hamthatna atana sawrkar laipuiin scheme hrang hrang a siam bawhzui a nih dan te thlir a ni.