Clinic leh laboratory-te fimkhur taka kalpui turin chah

Kolasib District Bawrhsap John LT Sanga chuan Kolasib District chhunga clinic leh laboratory enkawltute chu thih leh dam inkar hriltu a nih theih avangin, mihring himna dah pawimawh hmasa ber chunga danin a phut anga clinic leh laboratory te kalpui zel turin a chah.
Kolasib District chhunga hriselna dinhmun enfiahna leh inentirna (clinical establishment)-te dan anga chhinchhiah leh khuahkhirh tura din, District Registering Authority (DRA) thutkhawm ah Chairman, Kolasib District Bawrhsap John LT Sanga chuan mihring taksa hriselna dinhmun enfiahna (laboratory) chu natna chungchanga inenkawl zui zel dan tur hriltu a nih avangin a pawimawh hle tih a sawi a. Mihring himna leh hriselna khawih a nih angin clinic leh laboratory-te chu fimkhur taka kalpui a \ul tih a sawi a. Clinic leh laboratory-te khuahkhirh leh vil zui tura din DRA chuan thuneihna leh mawhphurhna sang tak a nei tih sawiin, member-te chu tihtak zeta an mawhphurhna hlen chhuak turin a chah bawk.
DRA Convener, Kolasib District Senior Chief Medical Officer Dr RK Lalthlamuana chuan Clinical Establishment Act, 2010 hnuaia clinical establishment-te zawm tur tlangpui sawifiahin, clinic leh laboratory te chu DRA-ah an inziah luh (register) vek a, a him chin leh pawm theih chin (minimum standard) an phak ngei ngei a \ul thu a sawi a. Kolasib District chhunga laboratory-te tan minimum standard training buatsaih a nih tawh thu sawiin, laboratory-te’n chhinchhiahna an tar tur te, himna tura zawm tur te, faina leh thianghlimna kawnga zawm tur te, khawl enkawl dan tur te, thawktute thiamna ngai chin leh thil pawimawh hrang hrang inzirtir a nih thu a sawi.
Kolasib District chhunga DRA hnuaia hma lakna tur hrang hrang sawiho niin, Clinic leh laboratory provisional registration nei tawh sate chu DRA hnuaia registration puitling nei thei tura danin a phut ang hlen chhuah nan kum 2 chhung hun pek an ni dawn tih an sawi a. Provisional registration la nei lote chu thla ruk chhung hun pek an ni dawn tih sawiin, Kolasib DRA chuan sawrkar hriatpui loh leh dan anga taksa dinhmun endik leh damdawi chawh phalna nei lote lakah fimkhur a, chuti ang chu pan lo turin Kolasib District mipuite an chah tih an sawi bawk.
Kolasib CMO Office-in an chhinchhiah danin, tun dinhmunah Kolasib District chhungah sawrkar hriatpui clinical establishment 33 awm mekin, hemi zinga pasarih te chu government establishment (District Hospital, Community Health Centre leh Primary Health Centre) niin, a dang 26 chu mimal din (private) laboratory leh clinic a ni thung.