Clinical Case Conference nei

College of Veterinary Sciences & Animal Husbandary (CVSc & AH), Central Agricultural University Selesih chuan October 13 & 14 hian National Clinical Case Conference chu an college-ah an hmang.
Zirtawpnia a hawnnaa an college-a dean hna lo chelh tawh thin professor pahnih – Dr Gaj Raj Singh leh Dr D Kathiresan ten an hmanpui a. Dean ni mek Dr Lalnuntluangi Hmar chuan he hun hmang tura India ram hmun hrang hrang atanga veterinary doctor, researcher leh scientists kalkhawmte hnenah lawmthu a sawi.
Conference hi CVSc & AH, CAU Selesih leh Small Animal Practioners Association Guwahati tangdun buatsaih niin, an thupui chu “A New Era of Diagnosis and Therapeutic Approaches to Combat the Animal Diseases” tih niin, a awmzia ber chu, tunlaia ran natna chi hrang hrang, tharlam tak tak pung zel kara ran natna chhuichhuah leh enkawl dan tharlam ber ber hman ve nghal zel theihna tur, tih lam a ni. India ram hmun hrang hrang atangin mi 102-in conference hi an rawn chhim a. Thematic session bakah technical session 1 to 5 a then niin, kalkhawmten an hna (case) khawih tawh leh tawnhriat atangin powerpoint presentation hmang sawiin an zir ho dawn a ni.