CLP-in chhawmdawlna sum a hlan

CLP-in chhawmdawlna sum a hlan
Manipur buainaa Zohnahthlak harsatna tawkte puihna atan a tul apianga hman turin Congress Legislature Party (CLP) chuan Thawhtanni khan Central YMA hnenah cheng nuai khat an hlan.
CLP thuchhuak chuan Manipur lama Zohnahthlak unau harsatna nasa tak tawk mekte an hrereng a, buaina leh harsatnain kiansan thuai se an duh takzet a. An tana sawrkar leh tlawmngai pawl hrang hrang hmalakna an thlawp tlat a. Zohnahthlak unaute mangang leh thlabar taka an awm laiin, he thil thleng hi tumahin politics-a hamthat lakna atan hmang lo ila an duh tih a sawi.
‘Sawrkarin min mamawh phawt chuan keini chuan kan tih ve theih tawkah tlanchhiat kan tum loa; kan tih theih a tlem emaw a tam emaw pawh nise, kan unaute tan hian kan inhawng reng a ni tih sawrkar pawhin min hriatsak se kan duh a ni,’ a ti.
Hnam thil a nih ang ngeiin Mizoram sawrkar chu ‘All Party Meeting’ emaw ‘Session’ emaw koin, kan unaute tana kan hmalak dan tur chu relho nise, hmalakna a chak lehzualin CLP chuan a beisei tih sawiin, ‘Kan duh loh thil a thleng a ni tawh si a. A thleng ta sa sa, he thil thleng hian kan inunauna tichakin, Zohnahthlakte inhmangaihna tizualtu ni mawlh rawh se, tih hi kan duhthusam a ni,’ a ti.
Mizorama Zohnahthlak unau raltlan mekte pawh Zofate Jerusalem-ah an rawn thleng tih hria a, inthlahrung lo tur leh, Manipur lama kan unau la awmte pawhin an unaute kan awm tih hrereng turin CLP chuan a chah tih a sawi a. Zofate hi he harsatna hmang hian kan inpumkhat lehzual an ringin an beisei tih an sawi bawk.