Club neitu thar Messi

Argentine legend Lionel Messi chu Catalan club Cornella neitu thar a ni ta tih Spanish club hian Ninghani khan thuchhuah siamin an tarlang.
Kum 38 mi hian Barcelona tana a khelh lai khan Champions League title pali bakah La Liga title 10 zet a lakpui hman a, Catalan giants kha a club neihchhun a nih mai rinna a len hle laiin France ramah a insawn a, chuta tangin kum 2023 kan Major League Soccer club Inter Miami zawm turin United States a pan ta daih a nih kha!
America lam lamah hun rei tak bur tawh mah se Catalan lamin a lung a la len ber a nih a rihawm a, he lai biala Spanish club a lei ta chiah a ni.
Cornella thuchhuah chuan eight-time Ballon d’Or winner Leo Messi chu dan ang taka club neitu a nih thu an puang a, Spanish football inkhaidiat dana fifth tier daih ni mah se Messi vanga an phurna hian eng division-ah tak kaichhohpui ang maw?!
Club thuchhuahin a tarlan zel danin, Catalan club a rawn lei leh chiah hian Messi leh Barcelona inzawmna la nghehzia a pholang niin an sawi a, Catalonia biala football hmasawnna a ngaihpawimawhzia leh tualchhunga talent inphum haichhuah a duhzia lantirna a ni bawk tiin an sawi.
“Leo Messi lo lang ta hi he club history-a bung thar intanna niin, sport lam leh player chherchhuahna kawngah hma a sawn ngei dawn a, he club lungphum hi a ngheh phah sawt bawk a, talent nei thate senglutin, player thate pawh a hip sawt dawn a ni.
“Hmathlir thui tak nei chungin project kalpui a ni dawn a, tumna leh daihreina nen, tualchhung player nena inzawm tlat chungin club rintlak nih a tum zel dawn a ni,” an ti.
Hriat tlanglawn tawh angin, Messi hian kum 13 mi lek a nih laiin Argentina a chhuahsan a, taksa lam fel lo avangin pumraw lian lo tak ni mah se Spain rama sengluttu Barcelona club thuneitute chuan a theihna an hmu chiang a, sum sengin an enkawl a, October 2004 khan rawlthar kum 17 mi lek ni chungin Barca tana a first-team debut a nghakchhuak ta hial a ni.
Kum 2021-a Paris St-Germain a zawm thut hma khan Catalan club tan game 778-ah goal 672 thunin, hei hi tun thlengin club record a la ni.
672 goals in 778 games before he left for Paris St-Germain in 2021, and he then moved to Inter Miami in 2023.
Messi club thar kan hriat hma kumin February thla mai khan Spain rama an khelh dun laia Messi elpui lian ber Real Madrid star hlui leh Saudi Pro League side Al-Nassr player ni mek Cristiano Ronaldo pawh khan Spanish club ve bawk Almeria-ah sum tam tham zet a chhunglut a, he club-a chanpual zaa 25 zet a nei mek.
Messi club ni ta Cornella stadium hi mipui 1,500 lek thut lenna ni mah se Arsenal keeper David Raya bakah Barcelona leh Inter Miami defender hlui Jordi Alba-te rawn zikchhuahna club a ni ve ngat!