Stuttgart Open last 8 lut Rybakina, Gauff

Germany rama tournament lian khelh mek Stuttgart Open-ah nimin khan an tumpui ve ve hnehin top two seed Elena Rybakina leh Coco Gauff-te’n women’s singles quarter-final an lut a, Mirra Andreeva pawhin Wimbledon champion Iga Swiatek nena semi-final luh inchuh turin round sang zawk a inhlangkai ve bawk.
Rybakina hian break point hmachhawn loin Diana Shnaider a paltlang a; Gauff chuan bul tan ropui vak lo chungin Liudmila Samsonova a hneh a; a tum ngana atana French Open title beisei zui mai tur Swiatek chuan a clay season bultannaah Laura Siegemund a tuktlawm ve bawk.
Australian Open champion Rybakina chuan Shnaider lakah 6-3 6-4 hnehna chang, American Gauff pawhin 7-5, 6-1-a Samsonova paltlang, Andreeva chuan Alycia Parks lakah 7-6(3), 6-3 hnehna a chang.
Kumina a claycourt match hmasaber a khelh zawhah Kazakh world number two Rybakina chuan a hnehna sualchhuah avanga a hlim em em thu sawi chungin hmasawn a ngaih nasat thu a sawi.
Clay season-a a kumin match hmasaber hnehna a chan danah Gauff chu inchhuang lutuk lo mah se world number three hian last eight chu a lut ta phawt a, clay court boruak a thlir dan sawiin, “He leilung hi ka ngaina a, ka haw tel bawk.
“Khelh thatin a hlimawm a, a nih loh chuan a lawmawm leh miah lo a, vawiin hi chuan ka ziaawm e,” a ti.
Karliamta maia Linz Open title latu Russian world number nine Andreeva chuan Nilaini khan Stuttgart Open defending champion Jelena Ostapenko hnawtchhuakin, American Parks laka hnehna a chan leh rual khan kumin bikah a zawnin claycourt match ruk a chak tling ta a ni.
Tleirawl kum 18 mi lek la ni Andreeva tum leh tur Polish third seed Swiatek pawhin Nilaini khan last 16 match pakhatah 6-2, 6-3-in Siegemund a hneh a, an intum hnuhnung vawi thuma tum hnih ngawt a ngam loh Andreeva lakah nizan khan fiahna lian a hmachhawn zui leh a, mahse, kha match thum kha hardcourt-a khelh vek niin, tuntum hi chuan clay leilungah a ni tawh dawn a, a boruak a dang deuh tawh ang em?!