Mau chungchanga chief minister Zoramthanga advance dan chu mipuiin kan hrethiam pha lo zawk niin MNF MLA Dr K Pachhunga chuan a sawi.
-- Advertisement --
Thawhtannia MNF office, Mizo Hnam Run inkhawmah Bamboo Development Board vice chairman Dr K Pachhunga chuan mau lama MNF president Pu Zoramthanga hmalakna hi sawiin, “Kan pu hi a advance em em a, mipuiin kan hriatthiam pui phak thin lo,” a ti. Ram leilung hausaknate chu haichhuah chawp ngai a nih thin laiin, mau erawh chu kan chin ni miah loin kan ramah a tam a, hengte hi technology thiamna hmanga hman tangkai theih a ni, tiin a sawi.
“Mizoram maute hi Taiwanah te, India institute-ah te kan thawn a, mau chi tha vek an ni, a tha ber chu mautak a ni,” a ti.
State sawrkar chu Delhi atanga fund lokal ang zela inrelbawl an ni tih Dr K. Pachhunga hian a sawi a. Mahni state-a duhthu kan sam ang ngawt a ni lo, tiin, “Delhi phal tawka nung kan ni tih hi kan hriat a ngai. Vawiina sawrkar beitute hi sawkarah awm ve ta se, kan hotute ne pawh ek lo tur an ni. Keini chu time tested leader nei kan ni a, hatsatna tinreng paltlang tawh hruaitu nei kan ni,” a ti.
MNF sawrkar chu sawrkar tha a nih thu MNF MLA hian a sawi a. Tui lak, gas leh buhfai supply bakah kawngpui tha kan neih thu te; raltlan buaipui kawngah pawh sawrkar tha a nih thu te; kuhva leh smuggling thawm ri fote chu sawrkar duhdan a nih bik loh thu leh theihtawpa tanrual ngaih a nih thu te a sawi bawk.