CM adviser atanga ban chhan pahnih

Finance leh Planning bika adviser to chief minister atana ruat TBC Lalvenchhunga, MLA chuan adviser a nihna atang hian banna a thehlut.
The Aizawl Post-in thu a dawn danin November 17 chawhnu khan chief minister hnenah TBC Lalvenchhunga hian banna hi a thehlut a, ZPM party hruaitute a hriattir bawk.
A ban chhan zawhnaah, ban chhan chi hnih a nei tih a sawi a. MLA a nih angin legislator tih tur leh telna hrang hrang – Assembly Standing Committee panga (telin) ah a awm a. Bial nei a nih avangin a bial tan hun a hman a ngai bawk. Finance leh Planning bikah chief minister puih a tulna leh sawrkar tana a tih tur tul zual a sukiang tawh ni ah a ngai tih a sawi a ni.
Hetiang hi a nih tawh laiin, amah bik chu chief minister adviser neih tul ti lo leh, senso hautak thu sawi kawnga an sawrkar chirhthehnaah a hming sawirik tel a ni ziah a; adviser atanga chawlh tawh chu a tha zawkin a hria tih a sawi.
A pahnihnaah chuan, ZPM party tan a tulna apiangah hun tam zawk hman theih a duh a, chumi atan chuan an hotute pawh a dil tel nghal tih sawiin, party tana nasa zawka inhmang tur chuan, CM adviser a nihna anga tih tur tul a tam avangin, chawlhsan tawh a duh tih a sawi bawk.
Zawhna chhangin TBC Lalvenchhunga chuan, CM adviser dangte chu an hna chanpual leh ruat an nih chhan a inang loa; a ni chuan a harsa zual sut ngai a sukaw khat tawha a ngaih vangin chawlh a duh a; adviser dangte erawh CM leh sawrkar tana an pawimawhna a la awm avangin an chawlh ve kher tul tihna a nei lem lo tih a sawi a ni.
CM adviser atanga ban a duh chhan chu chief minister leh an party hruaituten an pawmsak ngei a ring tiin zawhna a chhang.