CM adviser-in Zo hnahthlakte tlawh

Nikum lam atangin Manipur state-ah Zo hnahthlakte leh Meitei an indo a, Zo hnahthlakte hian an inpui Mizoram state an bel nghal. Mizoramin Manipur-a Zo hnahthlakte hi mit a hupsan lo a, tunah pawh adviser to chief minister (political) Lalmuanpuia Punte-in Zo hnahthlakte a tlawh kual mek.“Kan unaute hian puih an ngai a, kawng hrang hrangin puih an ngai. Ei leh barah pawh puih an ngai,” Muanpuia chuan a ti.
Kar hmasa Zirtawpni khan a thleng a, a hmatawnga ‘duty’-te a tlawh kual mek. A awm lai hian khaw pakhatah chuan duty-te’n eitur an nei lo tih thu dawn a ni.
Manipur hi a hma anga inbei bur bur chu an ni lo a, mahse khaw hrang hrangah mipui an la ‘duty’ a ni.
“A hma angin an buai nasa lo a, inkah pawh a awm rih lo tih theih a ni. A tir atangin Zo hnahthlak lam hi a che hmasaah an tang ngai lo a, Meitei-in an ti hmasa a nih loh chuan an inkap lo. Tunah pawh hian Meitei lam hi an chawl nge ni, a che rih lo a, chuvang chuan an inkap lo a ni mai a,” Muanpuia chuan a ti.
Mipui tanrualna a fak a, khaw hrang hrangah mipuiin mahni ram venhim hna an thawk tih sawiin, “An inpekna hi a zahawm khawp mai,” a ti.
Hetia Zo hnahthlakte a tlawh hi Manipur sorkarin a enghelh viau nia hriat a ni a, tun buainaa hmun ralmuang lo pawl Kangvai-a a kal phei chu, Manipur DGP-in Mizoram DGP a be nghal tih thu dawn a ni.
“Mizoram mipuiin kan unaute hi kan hriat reng a ngai a, puih an ngaihzia pawh hi sawi nawn fo a tha ang,” Muanpuia chuan a ti.