Hospital-a naupang thihnaah Ruallung lung a dam thei lo

Ruallung khaw naupang, Aizawl private damdawi ina a thih danah thil dik lo a awm nia hria in an khawtlang an lungawi thei loa, Thawhtanni khan an khuaah kawng zawhin, an beisei anga hma lak a nih loh chuan a tul anga bawhzui an tum tih an sawi.
Ruallung Village Council leh All NGO thuchhuak tarlan danin, Lalfakzuala @ Faktea (12) s/o T Lalchhuanmawia, Ruallung hi hi Kumin March 11 khan school chawlh lai remchanga la in Faktea hi a pa in check-up tur Aizawlah a nu nen an kalpui a. Hemi ni tlai lam hian a remchan em avangin ENT specialist-ah amah hi check-up ve a ni a, ENT doctor-in a tonsil zai a ngaih thu a lo hrilh a, school chawlh laia intihfel hman duhin, March 12-ah LRM Hospital doctor an rawn leh a, March 13-a zai theih a nih thu in chhan an ni.
March 12 zanah Thenzawl leh Sihphir Venghlun inkhel enin Faktea leh a patea chu Zuangtui atangin Rajiv Gandhi Stadium Mualpuiah an kal a. March 13 chawhma dar 10.00 ah LRM Hospital-ah tonsil zai turin admit a ni. Hetih lai hian a taksaah damlohna leh harsatna a nei loa, amah buaipuitu hospital staff-te pawh hlim taka a kawm bakah a nu leh pa te nen an infiam a. Operation theatre-ah chawhnu dar 3.24 a nawrluh a ni.
Tlai dar 4.37-ah a dinhmun a that loh thu a chhungte hrilh an ni a, hemi rual hian engmah awmzia a awm tawh loh thu hrilh tel zui an ni. Zan dar 6.27-ah a nu leh pa koh an ni a, ICU-a dah luh a nih tur thu hrilh an ni. OT room atanga ICU-a dahluh dawn hian, mita hmutute chuan a boral tawh niin an hmu a. Zan dar 6.34-ah ICU-ah nawrlutin, ICU-a hun rei vak lo a awm hnu dar 6.45-ah ICU-ah a nu leh pa te koh luh niin, a thih thu hrilh an ni.
‘Faktea thih chhanah hian LRM Hospital chuan malignant hyperthermia niin an sawi a; mahse, a thih chhan nia an sawi hi pawm har kan tiin hriatthiam a har a, chuvangin en liam kan tum loa, kan beisei ang hmalakna kan hmu lo a nih chuan a tul angin hma lak zel kan tum,’ VC & all NGO thuchhuak chuan a ti.
Hetiang vanduaina hi tu chungah mah a thlen tawh loh nan, Faktea thihna hian rah tha zawk a chhuah ngei theih nan theihtawpa hma lak zel an tum tih an sawi bawk.