CM atan mipa diktak kan mamaw
– MBJP president
Hmasawnna atana a lu bera hruaitu thar ramin a mamawh a, Mizoram pawhin mipa diktak, mahnia thuthlukna siam thei chief minister a mamawh tih BJP Mizoram president Vanlalhmuaka chuan a sawi.
BJP Mizoram chuan Zirtawpni khan an State office-ah political session neiin Vanlalhmuaka chuan Mizoram mamawh ber chu chief minister tha leh pa taka ram kaihruai ngam a ni, tiin, “Khawvel ram hrang hrangten an ram hmasawnna atana an mamawh chu Prime minister/ President tha a ni. India ramin mihuaisen, corruption do ngam Pu Narendra Modi kan neih avangin khawvel hriat khawpin hmasawnna a thleng tawh a. Chutiang chiah chuan Mizoram pawh hian chief minister atan mipa diktak, mahnia thuthlukna siam thei leh hmathlir mumal tak nei kan neih a ngai. Mizoramin BJP sawrkar kan neih hunah chutiang hruaitu chu kan neih dawn avangin development dik a thleng dawn a ni,” a ti.
Assam Rifles sawn chhuak theitu tak tak chu BJP an ni tih sawiin, MNF-in Assam Rifles insawnchhuah chungchanga inti thei taka an tlangauna chu anmahni tih a ni lo tih hrechiangtu chu MNF an ni tih a sawi. Union Home minister Amit Shah lokal turin Mizoram tana hmasawnna hnathawh tur a hawn tur zawng zawng chu a vaiin cheng vaibelchhe 2414.027 chuang man a ni a, MNF sawrkarin Union minister rawn zin chhana an sawi AR hmun thar din leh Laldenga Hall vel ringawt chu mipui an hrilh duh chauh tih a sawi bawk.
“MNF sawrkarin an tuh loh rah seng tum tawh lo se, mipui hmaa insawitheih an duh a nih chuan, mipui hmaa an intiam pathum – SEDP cheng nuai 3 chhungtin an sem hunah te, kawngchhawng an siam hnu ah te, Mizoram tharchhuah ngei buhfai kan ei hunah duh leh insawi thei rawh se,” BJP Mizoram president hian a ti.
CM atan mipa diktak kan mamaw – MBJP president
Get real time updates directly on you device, subscribe now.