Thawhtanni khan Budget Session-ah home minister-in a demand sawihona hun hmawrbawkna hun a hman laiin ZLP leader Lalduhoma nen chief minister-in case a neih leh neih loh chungchangah an inhnial; chhun lamah ZLP leader hi MNF member Lalrintluanga Sailo nen hemi chungchangah an inhnial tawh bawk.
Home minister Lalchamliana hian a hmawrbawkna hun a hman laiin, chhun lama inhnialna chungchang hi a sawi a, Duhmanga leh Dardini thawnthu ang deuh, ‘Kan kehme tih a inang lo’ tih ang deuh a ni thei tiin, “Keini home department ngaihdan chuan kan CM hian case a nei lo,” a ti.
Chhun lama inhnialna chungchang hi police hotute a zawt tih sawiin home minister chuan, MPYCC leh Mizoram First te’n Lokayukta-ah Lengpui Aiport chungchangah CM lakah complaint an thehlut a, Lokayukta hian ACB te preliminary inquiry an tihtir tih chu police hotute chhan dan a nih thu a sawi a, “Police ngaihdan chuan case a la tling lo,” a ti.
Lalduhoma’n hei hi chhangin, home minister a zah thu leh, a thusawi dan mak a tih thu te a sawi a, “Lokayukta-in case an register chiang a ni,” a ti a, “Pawn lamah mithiam zawkte lo chhui zuiah dah tawh mai ila,” a ti. Police-in case an register tur ni awm tak a ni a, an register lo tih ka sawi mai a nia tiin home minister-in a chhang.
Home minister Lalchamliana hian hnathawka police chhawr chungchang a sawi a, “A hminga home changtu ka nih ve hnu hian pahnih chiah complaint kan la dawng,” a ti a, hei hi Chawnpui leh Durtlang-ah police officer in saknaa inchhawrna a nih thu sawiin, tun hma ngaihtuahin hetianga inchhawr hi a tlem tawh hle nia a hriat thu a sawi.
Member te’n police aiin mipuiin kuhva ro an man hnem zawk tia an sawi a sawifiah a, police-in ip (bag) 10550 an man tawh a, mipuiin ip 1344 an man tawh tih a sawi.
CM case neih leh neih lohvah inhnial Hnathawka police chhawr pahnih chiah kan hria: HM
Get real time updates directly on you device, subscribe now.
Prev Post