CM hlui fapa complaint thehluh police-in chhui zo

Kolkata Ballygunge Mizoram House leinaa inhnamhnawih anga puh a nihnaah chief minister hlui Zoramthanga fapa Ramthiansiama’n court-a criminal complaint a thehluh bawhzuia police-in an chhuina chu an zo thawhkhat nia hriat a ni.
Mizoram House leinaa inhnamhnawih anga puh a nihnaah Ramthiansiama hian kumin January 18 khan Aizawl District Court-a 1st class judicial magistrate HT Lalmawizuala hnenah criminal complaint a thehlut a, case ziahluh a ni.
Court hian Cyber Crime Police Station Aizawl hnenah chhuichiang turin a hriattir a. Cyber Crime hian kumin March 26 khan an chhuizawhna ‘investigation report’ chu court-ah a thehlut a. Hemi chungchanga thu thehdarh (post) siamtu chu Zosangzuala (Sena Zote) Phullen khua chu a mawhphurtu a ni tih hriat a ni.
Cyber Crime P/S investigation report-a tarlan danin, social media platform pakhat – Whatsapp-a thu thawntu (forwarder) mi engemawzat thu zawhfiah niin, an statement lak a ni a. An thil chhui hmawr bawknaah hian “Phullen Politics” Whatsapp group atanga lo chhuak a ni tih hriat a ni. Thu post irhchhuahna hi “Sena Zote” (8731065704) niin, a hming dik – Zosangzuala, Phullen a ni tih hriat a ni.
Cyber Crime Police hian Zosangzuala hi puh a nih thu, a nupui Laltharzeli kaltlangin an hriattir tawh a. Police hnenah in-report turin kumin March 15 khan koh a ni a. Zunthlum (blood Sugar) nei ang leh, thisen sang (high bood pressure, hypertension) neih chhuanlamin zin chhuah a harsat niin a insawi.
Police chuan Zosangzuala chu a hma thei anga a hriselna dinhmun thar ber Cyber Crime Police Station-a hrilh turin an hriattir a. Tun dinhmunah Zosangzuala hi police hmaah a la inlan loa, ngaihchan mek niin, court thuremna pawh nghah mek a ni tih sawi a ni.