CM hmu thei lote nawrh zel tum

CSS hnuaia Mizoram sawrkar hnuaia thawkten an thil phut tihhlawhtlin ala nih loh avang leh an thil phut sawipui tura chief minister an hmuh theih loh avangin, an ruahman angin hna thawk loin nawrh kalpui zel an tum.All Mizoram CSS Employees Coordination Committee hruaitute sawi danin, sawrkar laka an thil phut tihhlawhtlin tumna a awm lo nia an hriat avanga badge dum bela lungawilohna an lantir mek laiin, June 24 khan deputy chief minister leh DP&AR hotute nen an thukhawm a. Deputy CM hian CSS-te tana hma an lo laksak tawh dan sawiin, theihtawp a chhuahpuinaah an lawm hle tih an sawi.
Chutihrualin, an phut anga chief minister hmuh an dilna chu remchang siamsak an nih loh avangin, hmai hma ngeia chief minister an hmuh hma chuan an hmachhawp, pen/ tool down strike chu June 26-28 chhung hian kaltlangpui an tum tih an sawi a ni.
An kal zel dan tur chu chief minister an hmuh hnuah emaw chief minister an hmu thei lo a nih pawhin, an ngaihtuah zui zel dawn tih All Mizoram CSS Employees Coordination Committee (AMCSECC) hian an sawi.
Tarlan tawh thin angin, AMCSECC hian an dinhmun hniam lutuk chawikanna’n state sawrkar dawrin lungawilohna tum engemawzat an lo lantir tawh a. 2021 August 16-ah sawrkarin ‘Study Group on CSS’ a din sak a. Study Group hian an hamthatna tur – seniority based-a a tahtawla dahngheh (regularised/absorbtion), an tana recruitment rules siam, medical reimbursement an neih ve theih dan tur siamsak, transfer TA/DA siamsak leh rawtna dangte siam a ni tih a sawi.
Study Group hian kum hnih dawn a zirchian hnuin, recommendation siamin sawrkarah a thehlut tawh a, tun thlenga tih hlawhtlin a la ni lo tih sawiin, sawrkar official-te tum tam tak an dawr tawh bakah DP&AR changtu deputy chief minister hnenah cabinet meeting-a pawmsak turin representation thehlutin ngenna an thlen a; chief minister pawh sawipui tumin kumin May 6 khan appoinment dilin tun thlengin an la hmu thei lo a ni.
CSS Coordination Committee-ah hian sawrkar department hrang hranga CSS hnuaia thawk zawng zawng mi sing chuang an ni tih an sawi a ni.