Lui tui bawlhlawh ta lutuk tih fai tuma hma latu, Save the Riparian-in Tlawng fintu Tuikual lui hnatlanga an thenfai mek chu chief minister Lalduhoma chuan Zirtawpni khan zawm ve in, National Service Scheme lam nen mi 500 chuang an thawkchhuak.
Hnatlanga an chhuah hma in chief minister chuan, a huan pawhtu Tlawng luiah hian zanah len a deng ve fo thin a, a bawlhhlawh zia hmua hrechiangtu a ni tih a sawi. Tlawng leh a fintu luite thenfai tha a tihna a rei tawh hle laiin, Save the Riparian an rawn lang a, an hnathawh video a lo thlir a, sawrkar an beng harh a, mimal tak pawhin a tiphur a, hnatlangah a tel ve ta tih a sawi a ni.
“Engmah phut nei loa thalai tam tak in hnatlang thin hi hmuhnawm ka ti a, ka chhuang hle che u a ni. In hmalakna hian mipui min tiharh zel se, bawlhhlawh a hmunah chauh paih tawh thin ila ka duh hle a ni,” Lalduhoma hian a ti a. Plastic bawlhhlawh sawngbawlna sawrkarin a siam mek tih a sawi bawk.
Youth Services minister Lalnghinglova Hmar pawh hnatlangah hian a tel a. Save the Riparian hnathawh chhuanawm a tih thu sawiin, “Mizoram hi a takin in hmangaih a ni tih kan hmu a. Mipui harh thar ila, faina hi nghet takin nunpui ang u,” a ti. Chief minister chu hnatlang vailiam turin an sawm a, vailiam ringawt tura kal a duh loa, hnatlang ve ngei tura a rawn kal tur thu in a lo chhang tih a sawi.
Chief minister hian Save the Riparian hnatlang sensoah cheng nuai hnih a lo pe tawh a ni.
Hnatlangah hian Chief Minister Office-a official ho bakah zirna in 10 atangin NSS mi 500 vel an thawk chhuak a ni.
Save the Riparian hian an hmalakna thawhkhatnaah Model Veng leh Mission Vengthlang inrina lui, Sakhisih chu ni 20 chhung an lo thian tawh a. A thawh hnihna hi Tuikual lui hnarah tan lehin tun hi a ni 13-na a ni a. Ni 30 chhung an theih chen thenfai an tum.
CM hoin Tuikual lui thianfai
Get real time updates directly on you device, subscribe now.