Thli ruah leh rial vangin Chenna in 4726 a chhia

Kuminah thli, ruah leh rial thawk avangin Mizoramah in 4726 a chhia a, heng zinga 201 chu luah zui tlak loha chhe vek a ni.
Furpui hmachhawn dan leh lo inhmakhua lawk dan ngaihtuahin Disaster Management & Rehabilitation hotute chu an minister K Sapdanga hoin Zirtawpni khan an thukhawm a. Heta report danin kuminah thli chhia, ruah leh rial thawk vangin Mizoramah in chhe vek 201, luah zui tlak tawh loha chhia 630 leh thawmthat deuha luah leh nghal theiha chhe nel nual 3895, a vaiin 4726 a awm.
DM&R minister chuan Mizoramah lirnghing, leimin, tuilian, thlipui leh a dang kan tuar fo a. Nunna hial hloh leh chenna in chhia kan hre fo thin a. Kuminah fur hun pangngai kan thlen hma hauhin chhiatna kan tuar fe tih a sawi a ni.
“Khaw thenkhat ruahsur, thli leh rial tuar nasa zual an awm a, chhiat tawkte kan tawrhpui rualin State Disaster Response Fund atanga tanpuina awm thei leh kaihhruaina awm ang zela kan chhawmdawl thuai a tul. A hlimchhawn, an mamawh laia tanpuina pek hi physical leh mentally-in a hlu bik a ni. SDRF norms anga puihna kan pek theihna turin hun kan mamawh a, chuti chung chuan a hun takah pehhel khawtlai loin, an mamawh lai taka pek ngei kan tum tur a ni,” a ti.
Tunhnaia ruah leh rial avanga hmun hrang hranga harsatna thlengah District Disaster Management Authority/DC te hmalak leh mawhphurhna hlen chhuah danah kan remhriat dan a inchen lo viau nia a lan thu K Sapdanga hian sawiin, “Furpui a intan dawn a, eng harsatnain nge min tlakbuak dawn kan hre lo. DDMA chairman deputy commissioner-te lo inbuatsaih lawk ula, chhiatna leh harsatna a lo thlenin chawp leh chilha che nghal thei turin ka chah che u a. A hun taka chet loha nghah khawtlai hian harsatna tam tak a siam belh thei a ni tih hriat a tha. State sawrkar pawh chhiatna tawkte pui nghal thei turin kan inpeih reng a ni,” a ti.
Sawrkar lam atanga theihtawk chhuah bak mipui pawh fimkhur tur leh, an theih ang anga lo inpuahchah ve tura zirtirna leh hrilh hriatna kalpui uar deuh deuh a tul tih DM&R minister hian a sawi bawk.