CM-in a budget-in duhthu a sam lo tih sawi

Finance changtu, chief minister Zoramthanga’n Mizoram budget tur a pharhin duhthu a sam lo tih a sawi a, “Kan kal tawk tawk,” a ti.
Finance changtu hian February ni 13 khan 2023-24 chhunga Mizoram budget tur a pharh a, a sawihona hun hmawrbawkna hun hmangin Thawhlehni khan, sawihonaa (general discussion) member-te thusawi te a sawifiah a, “Ka budget rawn present-ah hian, duhthu a sam han tih rual a ni lo. Kan kal tawk tawk a,” a ti.
“Mi state pawh an kal tawk tawk,” tiin a chhunzawm a, Covid-19 hrilen hnuah sum harsatna a awm a, Mizoram pawhin hei hi a tuar niin a sawi.
Covid leh thil dang vanga harsatna a awm niin a sawi a, Covid hnuah sum rawn kal a tam tawh tia member thenkhatin an sawi chu “Covid hnua rawn kal chu a hmanna tur tih sa a ni. Thil danga hman ngawt theih a ni lo,” a ti.
Covid vangin a tirah Mizoramin cheng vaibelchhe 3000 chuang a hmuh tur a hmu lo niin a sawi a, “Vaibelchhe 3000 chuang, indaih lohna chu a la kal reng,” tiin sum indaih lohna chungchang a sawi.
Tun tum budget hi a siam pawh a har niin a sawi a, rem kual rem kual a ngai nia sawiin, kum 17 vel finance minister a lo nih ve tawhah a hautak ber tum niin a sawi a, “Ka phur zawng zawnga rit ber a la ni. Phur ve mah ula rit in ti ngawt ang,” a ti.
“Pathian tanpuinain kan ti naw naw a, tihian kan kal chho thei a,” tiin a sawi zawm a, sorkar hnathawk hlawh, a huna pek chungchang sawi chhunzawmin, thla thar ni hmasaah ni lovin tlema tlai deuhah hlawh pek an nih thu a sawi a, sorkar laipui lam an inpeih hma bik loh vang a nih thu sawiin, Mizoram sorkarin theihtawp a chhuah tih a sawi.
Leiba chungchanga member-te thusawi pawh a sawifiah a, Mizoram sorkarin hmun hrang hrang atanga sum a puk chu thil nihphung a nih thu sawiin, “Heng hi state kan nih tirh atanga kal dan reng a ni. Thil thar a ni lo,” a ti.
Congress hun lai pawhin state dangte tih angin sum an puk thin tiin a sawi a, “Puk dan tur India sorkarin a ruat angin,” tiin, Mizoramin India sorkarin a tih dan a siam angin sum a puk thin niin a sawi.
“State kalphung a ni. Chuvangin han sawi tehchiam tur a awm lo,” a ti a, state zawng zawngin pawisa an puk tih a sawi.
Mizoram sorkarin sum a puk sawisela sorkar sawiseltute chungchangah, zun in chu zunna tura siam a ni a, chuta zunga, thil tisual anga aupui vak vak ang a ni tiin a chhang a, “Hre lo palh kan awm pawhin i hria ang u,” a ti.
Ways and means hmanga sum puk a tam tia sawiselna pawh, hmarchhakah Mizoram chu ways and means hmanga puk tlem pawl a ni tiin a chhang a, India sorkarin a tih dan tur a duan sa angin state tinin sum an puk tih chu a sawi dan a ni.
Covid leh harsatna karah Mizoram a kal a, Covid len tirh atangin sum hmuh a tlem tih te sawiin, Covid te, ramri buai te, vawk hrileng te, lirnghing te, harsatna tinreng karah Mizoram a kal niin a sawi. Kum danga awm ngai lo, inthlan atan cheng vaibelchhe 200 budget-ah daha ngaih thu a sawi bawk a, a hautak thu a sawi. Central scheme hrang hrangah kum danga inhriatthiamna ang kha kuminah sorkar laipuiin a tih loh avangin vaibelchhe za tel a ngai tih a sawi bawk. Sum harsatna karah Samagra-a thawkte hlawh tur cheng vaibelchhe 92 vel dah a nih thu te, Green Tribunal lam duh danin bawlhhlawh sawngbawlna atan cheng vaibelchhe 50 chuang dah a nih thu te, mipuiin eng an chhit theih nan cheng vaibelchhe 157 dah a nih thu te, chutiang chuan mipui thatna tur hrang hrang budget-ah dah a nih thu a sawi.
Lengpui Airport-a trolley, thil danga lo hman chungchang pawh a sawi a, hetianga lo hmangtute an hau nia sawiin, pawisa an inchawitir niin a sawi.
Lengpui Airport chu India ram state khawpuia airport, state-in a siam, state-in a enkawl awm chhun a nih thu a sawi a, chei that mek a nih thu sawiin, siam zawhah chuan hmarchhak aiport-ah a aia tha a awm an rin loh thu a sawi.