CM-in Mizoram Bana Kaih Scheme 2024 a tlangzarh

Mizoram sawrkar flagship programme ‘Mizoram Bana Kaih (Handholding) Scheme, 2024’ chu nimin khan chief minister Lalduhoma chuan Vanapa Hall, Aizawlah a tlangzarh. Chief minister hian Scheme book pahnih ‘Bana Kaih Mizoram Handholding Scheme’ leh ‘Thlai thar hralh dan tur kaihhruaina tawi’ bakah Digital Portal a hawng nghal bawk.
Chief minister Lalduhoma chuan, hun rei tawh tak atanga an suangtuah tawh thin ‘Bana Kaih Scheme’ tlangzarh a ni ta chu lawmawm a tih thu sawi in, policy a hlawhtlin theih nana theihtawp chhuahtu leh thlawp tlat thintute inpekna ropui a tih thu a sawi a. Thlai thar pali lei nan sum dah fel a nih thu leh society kaltlanga lei tura ruahmanna duan a nih thu te sawiin, society chu politics tel lo, hruaitu tha leh mi thahnemngaite kaihhruai a ni tur a ni, a ti.
Sawhthing rate chungchangah, rate tha zawk Rs 50/- chung lama sawhthing hralh theite chu sawrkarin a buaipui dawn lo tih a sawi a, Rs. 50/- tling lova an hralh erawh chuan a tlin lohna zat kha sawrkarin a hnawhkhah sak thung ang, tiin a sawi.
Thlai thar lei tura sawrkarin a lo puan tawh te bakah, Kolasib leh Mamit district-ah kumina buhhum tharte Kg ah Rs 30/- zela leisak tum a nih thu chief minister hian a tarlang bawk.
Lalduhoma chuan Bana Kaih Scheme chu thawkrim leh taimate tana siam a nih thu sawiin, hmelhriat leh insawipui hmanga hmuh ve mai theih a ni dawn lo, tiin a sawi a. Implementing Department hnuaia Search Committee te’n endikna an kalpui hnuah chauh Progress Partner-te thlan an ni ang a. Progress Partner te tan sawrkar chu quarantor-ah a tang ang a, loan rul thate chu an loan interest sawrkarin a pe let leh vek ang a, rul tha lote erawh chu bank-in dan a siam anga an chunga hmalak a nih bakah a tul angin Handholding portal-ah an hming tar chhuah a ni ang. Handholding Loan component atan hian SBI, MRB leh MCAB nena thawhhona ziah phawt tur a ni, chief minister chuan a ti.
Bana Kaih Scheme chu Mizoram sawrkar flagship a nih avangin implementing department-ten an hna ngaihpawimawh hmasakah an nei tlat tur a ni, chief minister chuan a ti a; MLA-te pawh an bial chhungah theuh tha taka kalpui a nih theih nan tan lo la turin a chah nghal a ni.
Agriculture & Farmers Welfare Minister PC. Vanlalruata, Chairman, Mizoram Agricultural Marketing Board chuan, kuthnathawktute dinchhuah nana an au hla Bana Kaih Scheme hawn fel a ni chu lawmawm a tih thu a sawi a. Thlai thar lei sak theih tur portal-a ziah luh tawh chu mi 45,585 vel an ni tawh tih sawiin, a zat hi la danglam thei a ni, a ti.
Agriculture minister chuan portal-a sawhthing chingtu inziak lut tawh 25,154 atangin quintal 10,84,975 thar chhuah theih beisei a nih thu a sawi a; Aieng chingtu 3,414 atangin quintal 77,492; Hmarchate chingtu 8,517 atangin quintal 36,774 leh Hmunphiah chingtu 8,500 atangin quintal 1,20,000 thar chhuah beisei a ni bawk. Minister hian marketing bakah link road-te ngaihpawimawh tel an tum thu a sawi bawk.
MBK Scheme tlangzarhnaah hian Dr. KC. Lalmalsawmzauva, Vice Chairman, MSPCC (Mizoram State Policy Coordination Committee) chuan inlawmna thu a sawi a. Lalmalsawma Pachuau, Member Secretary, SPCC & Secretary to the Government of Mizoram chuan Bana Kaih Scheme sawi hawnna neiin Upa Lalliansawta, Chairman, ZOHANDCO in ‘Bana Kaih’ hlanna hun a hmang a. Ramdinliani, IAS, Special Secretary to the Government of Mizoram & Member Secretary, Mizoram Agricultural Marketing Board-in lawmthu sawiin hun a khar a ni. Chief Minister chuan scheme tlangzarh puala stall siamte a tlawhkual nghal a ni.
Nimin vek khan sawrkar hnathawk Deputy Secretary leh a chunglamte bakah SDO (C) leh BDO te pualin thlai thar lei tur chungchang inhrilhhriatna hun hman a ni bawk.
Thlai chingtu zat Beisei zat (qtl)
Sawhthing 25,154 10,84,975
Aieng 3,414 77,492;
Hmarcha 8,517 36,774
Hmunphiah 8,500 1,20,000

Bana Kaih Scheme hmang hian hmasawnna tlo leh tluantling (sustainable development) hmanga Mizoram chu ram changkang (developed state) a hlankai tum a ni a. Apex body chu CM kaihhruaina hnuaia din Mizoram State Policy Coordination Committee (MSPCC) niin Nodal Department chu Planning & Programme Implementation Department a ni a. Bana Kaih (Handholding Scheme) hnuaiah hian Implementing Department 16 awmin, component 5 a awm ang.