CM-in Sairang – Hmawngbuchhuah rel kawng kal dan tur thlirpui

Nimin khan Chief Minister Lalduhoma chuan a office-ah Indian Railway Chief Administrative Officer Anjani Kumar Maurya leh a thawhpui Railway mi pawimawhte a kawm a. Sairang leh Hmawngbuchhuah inkara rel kawng kaltir an tum dan a thlirpui.Chief Minister chuan Mizorama Railway lamin hma an lakna lama a rawtnate an ngaihpawimawh thin avangin Railway Minister Ashwini Vaishnaw chungah lawmthu a sawi a. He rel kawng kal tur hi mipuite tana a tangkai thei ang bera a kal theih nan rawtna kan nei thin a ni, a ti.
Sairang – Hmawngbuchhuah inkar hi Railway hotute sawi danin Km 230.110 a thui ni turin an rawn duang a, station 20 a awm ang a, darkar khata kilometre 130-a chaka rel tlan theihna turin rel kawng hi an siam dawn tih an sawi a ni.
Station hming leh a paltlang ram hmingte chu a ram neitu khaw hming dik tak zel puttir turin Chief Minister hian a chah a, eng emaw han tihdanglam duh tlem azawng rawtna a nei bawk.
Chief Minister hi Lt. Col. Clement Lalhmingthanga, MLA; Sudir Kumar, Principal Secretary, GAD; Vanlaldina Fanai, Commissioner & Secretary to CM leh Er. Lalhriatpuia, Aizawl DC ten an tawiawm a ni.