Manipur Zohnahthlakte tan Mizoram chief minister Zoramthanga hmalakna ngaitheiloa Meitei misual thenkhatin a thlalak/ lim hmun hrang hranga an hal chu amah Pu Zoramthanga ropui zia tarlannaah an ngai tih MNF Thalai chuan an sawi a. Khawvel hmun hrang hranga cheng Zofate tana pa nih tling MNF president leh chief minister an nei chu an chhuang takzet tih an sawi.
MNF Thalai vice president Zodinpuia chuan Manipur-a cheng Zofate leh Zohnahthlak MLA 10-ten inrelbawlna hran phuta hma an lakna chu MNF-in a thlawp tih sawiin, Zofate himna turin theihtawpa ke pen zel an tum tih an sawi a. Mizoram sawrkar chhinchhiah danin tun dinhmunah Manipur atanga Zohnahthlak raltlan hi district hrang hrangah mi 10091 an awm mek a; Manipura Zofa unau harsatna tawkte tanpui turin Mizoram sawrkar chuan buhfai bag 9552 a thawnchhuak tawh tih a sawi.
Myanmar leh Bangladesh tualchhung buaina avangin Mizoramah sahimna zawngin raltlan tam tak an rawn tlanluh laiin, state danga raltlante chu an state police-ten manin, mi tamtak lung inah te an khung hial tih a sawi a. Mizoramah chuan chief minister-in ‘Myanmar leh Bangladesh atanga raltlan rawn lutte hi kan unaute an ni a, Mizoram sawrkar chuan kan lo tuamhlawm a ngai, tiin sawrkar laipui thu a dodal tih a sawi bawk.
Bangladesh atanga Zohnahthlak raltlante hi Lawngtlai district-a khaw hrang hrangah mi 773 awm mekin, Burma buaina vanga sahimna zawnga Mizoram lo lut district hrang hrangah mi 34278 an awm mek tih MNF Thalai hruaitu hian a sawi.
CM-in Zofate tan pa nih a tling – MNF Thalai
Get real time updates directly on you device, subscribe now.
Prev Post
Next Post