Inthlana ding tur tam zawk hriat tawh

Kum tawpah inthlanpui a awm dawn a, party lian
ticket-a he inthlana ding tur tam zawk chu a hriat tawh tiin a sawi theih ang. Amaherawhchu, thil a la inthlak thei a, ding leh lo te pawh a awm theih.
Ningani khan Zawlnuamah MNF-in Hachhek Joint Block conference an nei a, he hun hmanpuitu MNF president Zoramthanga, chief minister-in he biala an candidate tur a puang.
Rin lawk ang ngeiin Hachhek biala MNF candidate tur hi minister Robert Romawia Royte a ni a, an party president chuan Nilaini-ah Aizawlah nomination committee an Thut thu leh Hachhek biala ding tur hi puang tura an tih thu sawiin an candidate tur hi a puang a ni.
A chhuahsan Aizawl East II-ah hian minister R Lalzirliana a ding dawn nia sawi a ni a, AMC ward IX bialtu B Lalawmpuii a ding dawn nia sawi a ni bawk.
Tuna MNF MLA 28-te zingah MNF ticket-in speaker Lalrinliana Sailo a ding leh dawn em tih a chiang lo a, midang chu ding leh vek tura ngaih an nih bakah, bial sawn tura sawi pawh R Lalzirliana bak an awm lo. Serchhip biala ding turin J Malsawmzuala a chiangah ngaih a ni bawk a, speaker a chian loh thung avangin, candidate 40 awm turah mi 28 chu chiang tawhah ngaih a ni.
Congress party pawhin candidate tur mi paruk an puang tawh a, Serchhip, Tuipui South, Siaha, Lunglei South, Lunglei East leh Lunglei West bialtea ding tur an puang tawh. Amaherawhchu, Lunglei South-a ding tur hi a inhnukdawk leh.
Aizawl khawpui chhunga ding tur nia ngaih theih turin Congress party hian bial vil tura ruat an nei nual bawk a, hei hi chu an puangzar lo. An MLA neih lai mi parukte zingah bial sawn tur leh din nawn tum lo an awm rih lo.
ZPM chuan bial 35 viltu tur mi 35 an puang tawh a, bial panga an la bak. Bial vil tura an ruatte hi ding tura ngaih an ni a, MLA ni laite pawh an tel.