CM leh a adviser thusawi chungchangah thupha chawi

On Sep 22, 2025 3 0

Kar hmasaah CSS hnuaia mite’n dah ngheh phutin sit-in demonstration an nei a, a hmain a huhovin casual leave an lo la tawh bawk. Dah ngheh phuta sit-in demonstration an neih lai hian sorkar leh party lam nen an inchhangin an inbia a, sorkar hruaitute thusawi chungchangah ZPM party hruaitu pakhatin thupha a chawi tih thu dawn a ni.
September ni 18 zanah khan chief minister thusawi leh adviser to chief minister (finance) thusawi chungchangah ZPM secretary general-in thupha a chawi tih thu dawn a ni.
All Mizoram CSS Employees Coordination Committee hruaitute sawi danin, chief minister-in Independence Day-a a sawi leh adviser to chief minister (finance) thusawi chungchangah September ni 18 zan khan secretary general hian YRC-a an inkawm tumin thupha a chawi a, party aiawhin thupha ka chawi e tiin a sawi an ti.
All Mizoram CSS Employees Coordination Committee hruaitute chuan tun hnaia lungawi lohna an lantir chhunga sorkarin insawifiah tura a tihna sut turin sorkar an ngen a, Zirtawpni-a home minister nena an inbiakin hemi chungchang hi an sawi. Home minister chuan a department chan a nih loh thua chhangin, a lo ngaihven tur thuin a chhang tih an sawi bawk.
Insawifiah tura tihna hi a tam zawk chuan an chhang tawh ang tih an ring a, phalna nei lovin hna i chawlhsan tiin, hrem an nih loh chhan tur sawi tura tih an ni.
CSS hnuaia thawkte’n sorkar an chhan dan chuan, regularisation scheme an hman ve theihna turin sorkarin ngaihtuahna a seng miah lo a, DP&AR minister thurawn angin sorkara lehkha an thehluh pawh sorkarin a tibo a, chu chu mak an ti a, an ngenna tihhlawhtlin an phut thu an sawi.
Dah ngheh an nih loh laiin CSS hnuai pawh ni lo, health department-a thawk mi 31 chu Regularisation of CSS Employees Scheme, 2024 hmangin dah ngheh an ni lawi tih an sawi a, Independence Day lawmnaah chief minister-in CSS hnuaia thawkte chu dan lova lak tiin a sawi a, hei hi na an tih thu te, dan lova latute zawng chhuak tura an duh thu te sawiin, an ngenna tihhlawhtlin a nih theih nan September ni 9-11 chhungin mass casual leave an la a, chumi hnuah sit-in demonstration an nei leh tih te sawiin sorkar hi an chhang hlawm.
All Mizoram CSS Employees Coordination Committee chuan kar hmasa Zirtawpni khan lungawi lohna lantir an titawp a, thla khat chhung sorkar an nghak dawn tia sawi awm chungchangah, thla khat chhung kan nghak ang an ti lo a, home minister zawk khan thla khat chhungin tihfel ngaite an tihfel hman a beisei thu a sawi zawk a ni an ti.