CM leh party president nih kawp theihna dan kan enchhin dawn – K Sapdanga

CM leh party president nih kawp
theihna dan kan enchhin dawn
– K Sapdanga
Chief minister leh party president nih kawp a thatna leh that lohna a awm a, ZPM chuan kawp loh an enchhin tawh a, kawp an enchhin leh dawn tih an partu hruaitu K Sapdanga chuan a sawi.
Thawhtannia ZPM office-a inkhawmah minister K Sapdanga chuan, an party-in hruaitu thar an nei dawn a, an uluk bawka an thukhawm zing hle a, party leh sawrkar tana tha ber tura rin an thawhkhawm a, an rel chhuak tha viau nghe nghe tih a sawi.
“Kan danglamna pakhat zing ami chu, ZPM-in ‘leader’ kan nei hi a ni. Hetihlai hian, leader ber party hruaitu nih theih loh kha a fel lo hle. Chief minister leh party president kawp a thatna leh that lohna a awm a, kawp loh kan enchhin tawh a, kawp kan enchhin leh ang,” a ti.
ZPM-in 2023 MLA inthlanpuiah ‘technology power’ an hmang tangkai a, thingtlang kilkhawr pawh luhchilhin, that pawh an thatpui hle tih a sawi. Chutihrualin he information technology hian eng pawl leh kohhran pawh, committee chhungkua zawng zawng a luhchilh a, khawiah emaw chuan patling insum thei lo deuhten committee chhung thu an lo tih put (leak) a awm thin a, hetiang thil hi ruling party an nih avangin enbik an ni a, an tuar bik dawn tih a sawi.
“Fimkhur taka kan hman loh chuan min pawt hniamtu a la ni dawn a, kan chakna hnar pakhat kha kan chak lohna hnarah a chang thei,” a ti.
Sawrkar kal danah, lui mawng lam a la fim danah a hnar a fim tihna a ni, tiin, eptute sawi ang hian a hnar hi nu ni se, luidung tluan a nu tawh ang, tiin Home minister hian a sawi. Kum 40 vakvai tawh, eptu a nih lai pawha chief minister atana duhtu ngah berin ro a rel mek a. Lui hnar fim hian a tha zawngin sawrkar hmalaknaah hrinchhuah tam tak a nei tih a sawi bawk.
Kum 2023 inthlanah mipuiin hnehna an pek chhan langsar zual chu an inlungrualna, inpumkhatna leh thawhrimna kha an hmuh hmaih loa, mipuiin puih an chak tih ZPM hruaitu hian a sawi a. Kha’ng hunlai khan ram thlaphanna tidam theitu Pathian an au nasa a, kohhranin sawrkar tha duhin ka a ang a, an ni chu a hmanrua mai niin a zar an zo ta tih a sawi.
“Vawiina kan party kalphung, sawrkar kan enkawl dana kan inenna tur darthlalang fiah ber chu kohhran a ni. Kohhran mite hi kan lakah an thikthu lo chhe bik deuh mah se kan inhmeh bik a, Pathian lung kan tih awi zel chuan he ramah hian ro kan rel zel ang; a lung kan tih awi loh erawh chuan hniam takah min dah thung dawn. ZPM hian thahnemngai taka tawngtaisaktu kan la nei tam a, tun dinhmun kan enin kohhran leh mipui hian min la tan hlein a lang a, duhthlan tur dang an la nei loin ka hria,” a ti.
Inhtlanpui leh atan kum hnih leh thla khat vel inbuatsaihna hun an la nei a. A inelte chu party an ni a, mark petu erawh mipui an ni leh dawn tih a sawi a ni.