CM Rubber Mission-ah vbch.13 seng tawh

Mizorama rubber dehchhuah a tam zawkna atana sawrkarin programme a neih Chief Minister’s Rubber Mission chu district pahnih, Kolasib leh Mamitah kalpui a ni a, tun thlengin cheng vaibelchhe 13 sen a ni tawh.
Land Resources, Soil & Water Conservation hotute sawi danin, CM Rubber Mission hi 2024 December 16 khan chief minister-in a tlangzarh a. Kum 2025 atanga kalpui tan niin, phase I-ah Mamit leh Kolasib district-a hectare 1000-a zauah rubber ching tur progress partner 936 thlan an ni a, rubber tiak nuai 4.5 an phun nghal. Phase I-ah hian rubber chinna atan zau (cluster) 24 ruahman niin, cluster tinah hian a chingtute intelkhawmna – rubber producer society (RPS) din vek a ni a. RPS hi rubber tiak sem zinga a tha lo hnawl theihna thlengin mawhphurhna sang tak pek an ni.
CM Rubber Mission hi phase hrang hranga kalpui tur niin, phase tin hi kum 4 chhunga enkawl zui tur a ni a. Kumin atangin phase II kalpui tur niin, district 8-ah kalpui a ni tawh anga, ram hectare 2649-ah mi 2580 hnenah rubber tiak sem a ni dawn a, a tiak sem tur hi 1192050 phun a ni dawn. Rubber chingtu hnena a tiak an pek zingah a nung lo a awm a nih chuan a kum lehah a thlakna tur zaa 10 zel pek theih a ni a, hectare khatah rubber tiak 450 chin tura ruahman niin, pek belh tur chu tiak 45 a ni ang.
Heng bakah hian a enkawl zuina tur sum leh hmanrua engemawzat pek an ni tih sawiin, tanpuina an pek erawh, an tih zawh hnu zelah endik hnu ah pek tur niin, an bank account-ah direct benefit transfer-a thun a ni dawn tih an sawi a ni.
Zawhna chhangin LRS&WC hotute chuan, phase-I ah hian cheng vaibelchhe 13.64 sen a ni tawh a, kuminah vbch. 5.77 hman tura ruahman niin, kum 4 chhungin vbch. 28.97 hman a ni dawn tih an sawi.
He Rubber Mission hnuaiah hian a tiak chin thar chauh ni lo, rubber kung puitling nei tawhte rubber hnai, a grade tha zawka siamchhuah pui leh a hralhna tur ngaihtuah pui thlengin a huam vek tih an sawi bawk.
“Puihna dawng tawh, puih zui tlak loh an awm a nih chuan, an tawp pui ni ni kha department lamin a tawp pui hun tur a ni dawn a ni,” LRS&WC director Vanlalmuanpuia Chhangte chuan a ti. Kum 2027 atangin phase III kalpui turin an inbuatsaih leh mek a, rubber ching duh, hmalak dan tur hre lo chu department-ah ngaihven theih reng a ni tih a sawi.