Hec.7260 a zauah oil palm ching Ram 3% vel chuah kan la hmang – Agriculture minister

Mizoramah hectare 7260-a zauah oil palm chin a ni a, ram leilung zaa 3 vel chauh a la ni tih Agriculture minister PC Vanlalruata chuan a sawi.
Zirtawpni khan Agriculture & Farmers’ Welfare department buatsaihin ‘State Level Mega Oil Palm Plantation Drive – 2026’ chu Kolasib-ah neih a ni a. Hmanpuitu minister chuan, oil palm chin theihna hmun zawng zawngah ching vek pawh ni ila, Mizoram leilung za zela 3 vel chauh a la ni dawn tih a sawi a. National Mission on Edible Oils – Oil Palm (NMEO-OP) hnuaiah sawrkar laipuiin oil palm hmun nei tura min beiseina kan la pha lo hle tih a sawi.
India ram chu hriak (edible oil) lamah intodelh a tum avangin, sawrkar laipuiin duhsak takin mipui hmasawnna atan min kaihruai tih sawiin, Kolasib leh Mamit district-a oil palm chin theihna hmun zawng zawngah chin khah vek a nih theihnan tan lak a tul hle tih a sawi a ni.
Lunglei, Lawngtlai leh Siaha district-ah oil palm chin chhoh tan niin, Patanjali Ltd-in Lawngtlai district-ah khawl a bun mek a, an peih thuai beisei a ni tih PC Vanlalruata hian a sawi a. Sawrkarin loneitute khaichhuahnan hma a la nasa hle tih sawiin, oil palm chingtuten an thar chhuah an phurh chhuahna kawnga harsatna an tawh sutkianna atan MDONER hnuaia NESIDS-Road sum hmangin oil palm link road km 32.70-a thui PCC pavement-a siam hna thawh mek a ni tih a sawi. Hei bakah hian NMEO-OP scheme hnuaiah cheng nuai 840.44 senna tur ruahman mek a ni tih a sawi bawk.
“Oil palm chin atanga hlawhtlinna chang loneitu thahnem tak an awm tawh a, tunah phei chuan Cocoa nena chin kawp (intercropping) dan kalpui tum mek a nih avangin chingtute tan a hlawkthlak lehzual dawn,” a ti.
Report-a a lan danin, Mizoramah ram hectare 7260 a zauah oil palm chin niin, district 8-ah kalpui a ni a; kum khat chhungin metric tonne 7500- 8000 inkar thar chhuah thin a ni.
He hunah hian Kolasib district-a oil palm chingtu mi panga hnenah lawmman pek an ni a. Kum 2025- 2026 chhunga oil palm hralh hnem ber Zomuansanga hnenah leh ram neih dan teha thar hlawk ber Lalnunthari hnenah lawmman hlan a ni a. Hectare 5 aia tama hma la thar mi pathum – C Rothuamluaia, J Lalchhuanawma leh Lalnuntluanga Fanai hnenah lawmman pek an ni. VC anga oil palm chin zauh (area expansion) kawnga hma la tha ber Thingdawl VC hnenah lawmman pek a ni.