CM Special Package hnuaiah sumfaia tanpuina pek an ni – Lalrinpuii
Sawrkarin Bana Kaih Scheme a kalpui mekah Chief Minister Special Package hnuaia an ‘bana kaih’ te chu sumfaia tanpuina pek an nih bakah loan component hnuaiah bank kaltlanga sum puktir an ni tih minister Lalrinpuii chuan a sawi.
August 15 – Independence Day lawm Lunglei-a a hmanpuinaah minister hian, The Mizoram Bana Kaih Scheme-ah sum leh paia tanpuina leh mipui thiamna tihpun kawnga hma lak a ni a, phase-I zo felin phase-II a kal mek tih a sawi.
“Thalaiten eizawnna kawng thar dap a, sumdawnna hlawk zawk an neih theihnan state sawrkarin venture capital a siam vawikhatna leh hmasa ber, Mizoram Bana Kaih Venture Capital Fund cheng vaibelchhe 20 corpus fund kengtel ruahman a ni a. Mizoram Grand Challenge siam a ni a, Industrial and Investment Policy 2025 siam thar niin, investor lian tak tak koh luhnan investment promotion agency din a ni,” a ti.
Thlai thar market hnuaiah kuthnathawktute thar chhuah hlawk zawka deh ral a nih theihnan thlai chi li – sawhthing, aieng, Mizo hmarchate leh hmunphiahah support price pek a ni tih a sawi a. Kuthnathawh leh sumdawnna hmanga dinchhuah tum, tih tak taka bei chu CM Special Package hnuaiah sumfaia tanpuina pek an nih bakah loan component hnuaiah bank kaltlanga sum puktir an ni a; Bana Kaih hnuaia loan la tan sawrkar chu guarantor-ah tangin, loan pung an rulhna a rul let leh vek thin tih a sawi a ni.
Mizoram mipui zawng zawngin damloh nikhuaa man chawi loa inenkawlna an dawn theihnan Mizoram Universal Health Care Scheme (MUHCS) an kalpui mek tih Health & Family Welfare minister Lalrinpuii hian a sawi a. Changtlung zawka kalpui a nih zel theihnan Asian Development Bank nen cheng vaibelchhe 1000 loan agreement ziahfel a niin, zaa 90 chu sawrkar laipuiin a tumsak dawn tih a sawi.
MUHCS 2.0-ah sawrkar hnathawk leh pensioner zawng zawng nen chhungkaw 320123 (mipui 10,13,856) an inziaklut tih sawiin, kumin chhunga damlo enkawlna atana sawrkarin a sen tawh chu cheng vaibelchhe 68.32 a tling a. Sawrkar flagship programme – ‘ruang phurh’ hmangin kumin chhungin ruang 1145 phurhna man cheng nuai 45.95 pek chhuah a ni tawh tih sawi bawk.