CM Special Package leh Hand Holding Policy innghahna tlak a ni lo ti

CM Special Package leh Hand Holding Policy innghahna tlak a ni lo ti
Dampa bial by-election lo awm tura MNF candidate Dr R Lalthangliana chuan CM Special Package leh Hand Holding Policy te hi innghahna tlak a ni lo tiin a sawi a, hemi atan hian sorkarin sum a nei lo, a ti.
Khaw hrang hranga a kalnaah Dr Thangtea’n hemi chungchang hi a sawi a, ZPM-in Dampa bial by-election a an auhla leh mipui an vehthlemna ber Chief Minister Special Package, cheng nuai khat pek tih leh Hand Holding Policy chu mipui tan inghahna tlak a ni lo tia sawiin, “Kum hnih dawn ZPM sorkarah hian Dampa bial Silsuri-ah pakhat chauh la pek a ni. Hemi atan hian sum pek tur sorkarin an nei lo a, innghahna tlak a ni lo,” a ti.
“Hand Holding Scheme-a loan an aupui pawh hi mi rethei zawkte dawmkanna tur ni lovin, rulh leh ngei ngei ngai, pawisa pung tam tak nena leiba insiamna mai mai a ni thei” a ti a, “Mihring sing chuangin he loan hi an dil tawh laiin bank chuan mi 200 vel chauh loan an la pe thei a, ZPM sorkarin a thlanchhuah mi 700 chuang atangin mi 100 chuang zet chu bank hrang hrangin an lo hnawl tawh bawk. Sorkarin a nawrna avangin bank institution tlem zawkin loan hi an pe hram hram a, loan tha mi anga an zawrh mek hi inbumna mai a ni,” a ti bawk.
“Sorkar lai mekin kuthnathawktute a enkawl dan leh an hlawhchham chhoh mek dan kan hmu tawh a. Dampa biala hmunphiah chingtute tah leh rumna kan hria a, sawhthing chingtute sum tur cheng vaibelchhe 5 vel tihchingpen thu te kan hre zui leh a, an la bat sak teuh bawk. Chuvangin ZPM sorkarah kuthnathawktute tan beisei tur thar a awm lo a ni,” a ti bawk.