CM thlamuanpui dan hi thlamuanpui ngam a ni lo – MPCC spokesperson
CM thlamuanpui dan hi thlamuanpui ngam a ni lo
– MPCC spokesperson
Forest (Conservation) Amendment Act 2023 chungchanga chief minister sawi dan chu thlamuanpui ngam chi a ni lo tih Congress thupuangtu Lalbiakzama chuan a sawi.
MPCC thupuangtu hian, FCAA 2023 ah international border atanga km.100 chin sawrkar laipuiin ram venhimna kaihhnawihah a hmang thei ang, tihah, sawrkar laipuiin kaihhhruaina a siam thin ang zela tih tur a ni tih a chuang tih a sawi a. Tuna ‘rules’ hmuh theih chinah chuan sawrkar laipui thu thu a nei dawnin a lang tih a sawi. Khawi laiah mah state sawrkar thuneihna a pek belhna awm hmuh tur a awm lo tih a sawi bawk.
Chief minister-in a thusawia a sawilan, a thlamuanpui dan – BEFR 1873 leh FRA (Forest Rights Act) 2006 chu minor acts zing ami, constitution dan ni lo, Parliament-in simple majority-a a tih danglam theih an ni tih Lalbiakzama hian a sawi a. FCAA pawh BJP kaihhruai NDA-in opposition telloin Rajya Sabha-a a pawm a ni tih a sawi.
7th Schedule entry 18 leh 23 chu state-in a huamchhunga dan a lo siam ve theihna a ni. Central Act nen a inkalh chuan Central Act chu dingchang zawk tura dah a nih avangin lo thlamuanpui viau chi a nih hmel loh tih a sawi.
“Forest (Conservation) Act 1980 hnua TN Godavarman case-a Supreme Court ruling 1996, kan CM-in harsatna thlentu ber nia a sawi kan neih hnu pawh hian, Mizoram mipui kan zawh duh chu ‘tunge lo a vah dawna forest clearance dil tawh? Tu huan leh leilet nge ‘i nei thei tawh lo’ an tih sak? Development hna engzah nge kan lo thawh tawh? TN Godavarman ruling hnawk zia sawi laia BEFR Act leh FRA sawi tel duhlo khan FCAA hlauhawm loh zia tanchhanah tinge a rawn hman leh si?” tiin chief minister a zawt.
FCAA 2023 hian national security and strategic importance chuanlama hmangin hmarchhak minority state paldarh tumna hmanrua nia a lan thu MPCC thupuangtu hian a sawi a. Manipur leh Ladakh an sawisak duh dan enin, ngaih a tha thei lo tih a sawi.
All India Congress Committee hotute chuan central-ah INC leh a thurualpuite an lal hunah he dan hi ennawn an lo intiam tawh tih a sawi bawk.