Prevention of Corruption Act Special Judge court-in diklo taka zangnadawmna lak tum mi paruk thiam loh a chantir tawh te chu kum khat lung ina tang tur leh cheng nuai 20 theuh chawi turin a hrem.
-- Advertisement --
Special Judge (PC Act) Dr HTC Lalrinchhana chuan Tuirial Hydel Project dinna tur bial chhunga ram lak thua zangnadawmna felhlel tak thubuai ngaihtuahnaa 2023 February 7-a thiam loh a lo chantir tawh chu February 8 khan hrem an nih dan tur a puang a. C. Vanlalchhuana (75) Electric Veng Aizawl, Saiaithanga (58) Tuithiang Aizawl, C Rokhumi (86) Durtlang Aizawl, Lalduhawma (56) Durtlang Leitan, K Lalrawna (64) Champhai Bethel leh PC Lalthazovi (61) Durtlang Leitan te chu an ukil te, CBI ukil te leh anmahni, thiam loh chantir takte atangin Prevention of Corruption Act-in a phut anga hrem an nih lohna tur emaw an hremna tih nep na tura an dilna te a ngaihthlak sak a, thiam loh chantir takte chu an thiltih hi ram leh hnam bakah anmahni, chhungkua leh khawtlang tana thil pawi tak khawih an nih dan te hrilhin, tun hnu ah hetiang thil reng rengah inrawlh lo turin a zilhhau a ni.
Thubuai pahniha thiam loh chantir an nih tawhnaah hian kum khat theuh lung ina tang tur leh cheng nuai 10 theuh chawi turin a hrem a. Anmahni hi kum lama upa tawh, hetiang dan bawhchhiatna lian danga la inhnamhnawih ngai lo leh dan bawhchhe nawn tawh lo intiam leh ngaih an nih avangin, lung ina an tan hun tur, belhkhawma kum hnih hi kum khatah theuh lak kawp turin court hian a ti a. An sum chawi tur erawh hremna pahniha belhkhawmin, nuai 20 theuh chawi turin a ti a ni. Sum chawi tur hi an nei lo a nih chuan kum 10 dang lung in tan belh a ngai dawn tih a sawi bawk.
Thiam loh chantir takte hi February 7 tlai khan Central Jail-a dahluh nghal an ni a. Court-in a hremna a tihchhuak takah hian bail theih an nih avangin lung in tang zui loa bail an ni.
Court-in hremna chungthua a hmuh dan, Tuirial Hydel Project bial chhunga zangnadawmna felhlel tak thubuai a lak thutak hle chhan hi hetiang hian a tarlang:
# Ram lak thu-a zangnadawmna felhlel hmanga sum dawn hi Mizoram chhunga thil man sang uchuak tak thlen tirtu chhan pakhat a ni a, Mizoram eibar sumpai bakah mimal chhungkaw khawsak nunphung pawh a nghawng tel a ni.
# Thawhrimna rah mausama sum awlsam/ sumthlawk hmanga mihring nun hman hi natna chi khat, khawtlang nun bakah mimal rinna thlenga nghawng chhe tak nei thei a ni.
# Politics hri chhia hmanga sawrkarna fawng vuantu political party ten thuneihna an hmansual hi India ram mipui rorelna that tawklohna pakhat a ni a, hun kal tawh atanga zirchhuah a nih angin, chumi in hlemhletna a hrinchhuah erawh court thuneihna hmanga chinfel loh chuan kawng dang a awm mawh hle.
# Mizoramah sawrkarin ram a lak dawnin vanduaithlak takin ram inlei leh hralh a hluar hle a, chu chuan awmze neiloin mipui sum, mi hausa duham tak, tute emaw ipah a luhtir thin a, ram hmasawnna hmelma a ni a, chu chu thuneituten do ngam a tul. Chutiang a nih loh chuan hmalam hun thim tak kan hmachhawn mek tihna a ni ang.