CM Zorama’n buaina tih reh tum turin Manipur CM a rawn

CM Zorama’n buaina tih reh
tum turin Manipur CM a rawn
Manipur-a Meitei leh Zohnahthlakte inkara buaina chhuak mekah Manipur chief minister N Biren Singh chu he buaina ti reh tura a theihna hmang chhuak turin chief minister Zoramthanga’n thu a rawn.
Mizoram chief minister hian ziaka lehkha a thawn bakah telephone-in Manipur chief minister hi a bia a. Ziaka a ngennaah, state thenawma hetiang buaina thleng leh hnam leh hnam inkara innghirnghona awm mek chuan a rilru a ti na hle tih hrilhin, an thenawm intawm Myanmar bakah Bangladesh-a tualchhung buaina thleng mek leh Covid-19 hrilengin min sawpna atanga kan inthin harh lai leh, he hrileng a rawn inmun chhoh leh mek lai a, buaina belhchhahtu tur dang lo thleng chu pawi a tih thu a hrilh.
CM N. Biren Singh hi chu hetiang harsatna thleng chingfel thei tur khawpa theihna nei a ni tih a state mipuiin an hriatchian ang ngeiin, amah pawhin he buaina tih reh na’n lehlam lehlam huikhawma tuamdam turin thu a rawn tih a sawi a. Chutah chuan Mizoram sawrkar leh mipui pawhin theihtawp chhuahpui an inpeih reng tih a hrilh bawk.
Chief minister Zoramthanga hian Manipur-a buaina thleng chungchangah Zofate leh India hmarchhak mipui tan remna leh muanna a awm theihna’n theihtawp chhuah a tum tih a sawi a. Union Home minister Amit Shah nen an inbiak thu sawiin, pawisawilo leh nunau tam takin harsatna an tawk chu pawi an tih thu te, theihtawpa remna leh muanna a awm theihna turin Central Armed Police Forces dah belh a tum thu Union Home minister hian a rawn hrilh thu a sawi a ni.
Manipur CM nen pawh telephone-in an inbia a. Manipur dinhmun leh an buaina chungchang chinfel a nih theih dan tur an sawidun tih sawiin, Manipur CM hian, hmarchhak CM zinga upa ber chan chang a nih avangin, remna a awm theihna’n hma la turin a beisei hle tih Zoramthanga hian a sawi.
Manipur CM nena an inbiakna hian rah tha a chhuah ngei a beisei tih sawiin, pawisawilo leh nunau him taka an awm theihna turin CM pahnih hian thuchhuah intawm siam an tum tih a sawi bawk.
“Mizoram sawrkarin he buaina hi a enliam mai mai dawn lo a. Home minister leh Home commissioner kaihhruaina hnuaiah eng dinhmun pawh thleng se, kan mi leh sate himna tura hma kan lak dan turte lo inenlawkna meeting nei turin ka hriattir a ni,” chief minister hian a ti.
Mizoram Home department thuchhuak chuan, Manipur buaina hi a reh thuai Mizoram sawrkar chuan a beisei tih a sawi ve bawk a. He buaina avanga harsatna tawk Zohnahthlakte a hrereng tih sawiin, he buaina avang hian Mizo mipui chu buaina tipunlun zawnga hmalakna awm reng reng dodal turin a ngen.
Mizorama cheng hnamdang /Meitei te pawh thlamuang taka awm turin a ngen tih a sawi a. He buaina hi a hma thei ang bera tih reh a nih theihna’n anmahni zawna hma la turin a ngen bawk. ‘Mizorama Meitei awmte sawrkarin an himna ngaihtuahin hma a la tih hre tur leh ring tawk turin a chah a ni,’ a ti.