Central Jail dinhmun enfiah Aizawla jail 3 an tawt vek

Central Jail dinhmun enfiah
Aizawla jail 3 an tawt vek
Mizoram State Legal Services Authority member secretary R Vanlalena chuan Ningani khan District Jail Aizawl a tlawh a, Central Jail leh Central Women Jail Aizawl te a tlawh a, an dinhmun a endiknaah heng jail pathum hi awm thei zat aia tam an awm vek avangin an tawt vek tih a finfiah.
Supreme Court of India-in Sonadhar -vs- State of Chhatisgarh inkhinna thubuai kal meka order a siam leh Gauhati High Court Principal Bench-in Writ Petition (Civil) (Suo Moto) No.8 of 2018-a order a siam tawh angin, MSLSA member secretary hian jail chhunga tang awm thei zat, mipa leh hmeichhe tang zat leh jail tang lai Court-lamin bail an phalsak tawh si, engemaw harsatna avanga la chhuak thei lote chungchang endik turin jail hi a tlawh a ni.
District Jail Aizawlah tang 90 awm thei tura ruahman a nih laiin, tang mipa 143 an awm mek a, an zinga 116 chu UTP (thubuai ngaihtuah lai) an ni a, mi 27 chu convict an ni.
Central Jail-ah tang 438 awm thei tura ruahman a nih laiin mipa 889 tang an awm a, an zinga 601 chu UTP niin, convict 288 an ni.
Central Jail-a tang zingah hian 2023 April 13 atanga chawngheia nuar an awm a, heng chawnghei nuarte hi an vaiin mi 18 an ni. Member secretary chuan chawngheia nuarte hi an thil phutte zawtin an harsatna an enpui a. An tana hma laksak theihna awm ang angah chuan tanpui a tum thu leh an tana hmalakna chu lo ngaichang thiam turin chawngheia nuarte hi MSLSA hotu hian a ngen. Chutihlaiin an chaw ngheite chhunzawm rih tawh lo turin a ngen bawk. Hmalakna azirin an chungchang sawiho leh nise tih a ni.
Central Women Jail-ah tang 96 awm thei tura ruahmanah 273 an awm mek a, an zinga 234 chu UTP an ni a, convict 17 leh nute tan avanga naupang tang ve 22 an awm.
‘Tun dinhmunah Central Jail mipa awmna leh Central Jail Hmeichhe awmna bakah District Jail Aizawlah te hian mi tang awm thei tur chin bituk let aia tam fe an awm vek a, chuvang chuan tun dinhmunah heng Jail te hi a tawt hrehawm hle a ni,’ tiin MSLSA member secretary hian a sawi.
The Aizawl Post chhuan Central Jail-ah ruihhlo vanga man, an thubuai chinfel theih mai tawh court-in a la chinfel loh vanga chawngheia nuar an awm thu leh jail a tawt thu hi a lo tarlang tawh a ni