Coach tha bera ngaih Guardiola

Coach tha bera ngaih Guardiola
Football chanchina a team enkawl pahnih Treble champion nihpui thei manager hmasaber leh awmchhun Pep Guardiola chu football-in coach a neih tawha ropui berah football chanchin ziak leh sawitu (critic)-te’n an pawm tlangpui hlawm.
Inrinni khan a enkawl Manchester City chuan sikhat faia Inter Milan hnehin a vawikhatna’n Etihad club-in Champions League trophy an chawi a; Guardiola hian 2022-2023 season Premier League leh FA Cup-ah City a champion-pui tawh bawk a, Europe-a club trophy hlu ber a lakpui leh chiah khan manager ropui ber nihna hi midang chuhpui rual loha nghetah an ngai.
Kum 2009 khan Spaniard coach hian Barcelona chu league title, domestic cup leh European trophy a lakpui tawh bawk a, season khat chhunga trophy lian pathum tum hnih hui thei coach dang an la awm loh avangin Guar-diola hi ropui bera puan loh ngam a har ang!
Kum 52 mi hian trophy lian 17 la tling tawhin, hei ngawt hi a ropui tehna a ni lo a, team pahnih Treble champion nihpui theih hi level daih daih a ni!
Tunhnai khan France, Arsenal leh Barcelona striker hlui Thierry Henry chuan Guardiola hi hmaichhan ngeiah football-in manager a hrin tawh zinga ropui ber a nih thu a hrilh a, he thlirna hi footballer ropui dangte thlirna pawh a nih vek a rinawm!
Manchester City midfielder hlui Fernandinho pawh khan a pu hlui fakin, inkhelh laia thil thleng tur a sawilawkte chu a takin a thleng ngei dawn tih player-te a pawmtir thei niin a sawi a, thil thleng mila hriattur pawimawhte chu a player-te a hrilh vek thei niin a sawi!
Brazilian Fernandinho hian Guardiola a tawn hnuah football a thlir dan a danglam hlawk tih a tarlang tel.
He thu chiah hi Barca midfielder hlui Javier Mascherano pawhin lo sawichhuak tawhin, kum 2011 Champions League final-a Manchester United an hneh tum khan Guardiola danglam bik dan sawiin, “Inkhelh laiin ka han ngaihtuah a, thil thlen dan zawng zawng chu ka hriat tawh sa vek a lo ni a, a chhan pawh Pep khan min lo hrilhlawk vek a ni. A sawi apiang chu a lo thleng zel a, thil thlengte chu a sawilawk tawh ang vek a ni,” a ti!
Manchester City midfielder Ilkay Gundogan pawhin an head coach chu game thlir thiam lama mi chungchuang (genius) tiin a sawi ve chiah a, suangtuah theihin thil thleng zawng zawng chu a huikhawm (cover) kim vek thei niin a sawi!
Coach ropui mual liam ta Johan Cruyff pawh khan kum 2008-a Barcelona a enkawl hnu khan Guardiola chuan awlsam zawka football khelh a thupui ber tih lo sawi ve bawkin, a team chu level dang daiha hun chhuah a thupui ber niin a sawi.
Argentina boss hlui Jorge Sampaoli pawh khan City manager hi football-in a suangtuah ang zawng zawng kawltu ti hialin a fak!
Tuna Spanish football coach ni ta Victor Valdes pawh khan Guardiola hnuaia Catalan team tana goal a ven lai boruak sawichhuakin, “Guardiola nena kan titi dun hmasakber kha ka la hre reng. A Nou Camp office-ah niin, tactics board hi a lo inchhawp a, goal lehlam lehlam box pawn chiahah hian magnet tereuhte pahnih hi a lo beitir a, magnet pahnih chu tu (player)-te nge an nih min zawt a, min puitu centre-back pahnih an nih thu min hrilh.
“Kei chuan a sawi awmzia ka man mai lo a, min han hrilhfiah nghal a, ka kuta ball a awm chiahin chu magnet pahnihte awmna chu kan pawl centre-back pahnihte awmna atana a duh a nih thu a sawi.
“Kei chuan a ngaihna ka hre lo a, kan boss thar ngaihtuahna chu atthlak hlein ka ngai a; a han sawizawm leh a, ka ball ken chu kan defender-te ka pe ang a, anni atangin game kan siam chho dawn tih a sawi a, kan coach chu ‘a’ let tawpah ka ngai a, mak tihna ka nei tel bawk a; kan defender-te an huaisen a ngaih tur thu leh ka kut atanga ball siamchhuah chu lo dawngsawng hmasatua tan an duh a ngaih tur thu ka hrilh nghal a, ani chuan ka lo buai ve na tur a awm loh thu leh chu chu a hna a nih thu min hrilh a, ball nawr intanna an nih duh ngei tur thu a sawilang tel a, chu chu kan hun lai Barcelona-a engkim intanna kha a lo ni ta,” a ti.
Guardiola hnuaiah Catalan team chuan khawvel thar a dailut a, a hoin Treble champion an ni chho ta hial a nih kha!
Manchester City-ah pawh player 11-in ngaihdan (idea) thuhmunin hna an thawk a, chu ngaihdan chu eng dang ni loin coach duhdan (dream) a ni.
Barcelona leh a hnua a kalna Bayern Munich-ah khan a duhdanin thil a kal ta loin a hria a, a bungrua a khung mai a, a duhthala a chet theihna mual Etihad-ah chuan Treble champion a ni leh mai!
Chutia kan sawi rualin, Barca a chhuahsan hnu khan Germany ramah mahni tawka luhlul ve tak tak – Thomas Muller, Franck Ribery, Silva, Kevin de Bruyne leh Jack Grealish tihte a han hrual a, a ngaihdan leh thlir dan (philosophy) milin a kalpui leh thei mai bawk a!
Dani Alves khan Barcelona-a Guardiola huhang sawichhuak bawkin, Pep khan third tier lama chhuk turin min ti ta se chhan tha tak a nei tih ka hriat dawn avangin ka chhuk duh ang,” a lo ti ve hmiah tawh bawk!
Guardiola hi a player-te correct reng mi, an laka demand sang zel beiseitu niin, a chang chuan a player-te’n an zo lo ve thin a, May thla Champions League semi-final match-a Real Madrid an hneh tum pawh khan a ball chan a hloh tumin De Bruyne thiltih a pawm lohna a tilang a, Belgian mangang chuan, “Ngawi chip cham rawh. I thu leh hla hriat teivet hi ka kham zozai tawh,” a ti chiam pek!
Spanish coach tawngkam chuan hlawhtlinna kawngah a team enkawlte a khalh chhuak leh nge nge thin a; eng club pawh enkawl se ngaihdan lungphum (basic philosophy) a thlak ngai lo a, a player-te laka a beiseina pawh a tawpsan ngai lo.
Manchester City chairman Khaldoon Al Mubarak pawhin English club a lei laia a duhthusam pui ber tihpuitlinsaktu Guardiola hi mi bik a nihzia a hrechiang hle tawh a ni.
Istanbul khuaa Champions League title an lak rual khan Manchester City chu European Cup/Champions League trophy hawn thei English club parukna chiah niin, European club-te zingah Treble champion thei pariatna an nih laiin kum 1998-99 daih tawha trophy lian pathum huitu an thenawm Manchester United tih loha England atanga Treble champion ni thei awmchhun an ni nghal bawk tiin a tlang kawm teh ang.