Jeddah khawpuiah Benzema thli a tleh

Jeddah khawpuiah Benzema thli a tleh
|hangkhat lian zet Madrid khaw mipui lamtirtu ni tawh Karim Benzema chuan Santiago Bernabeu club chhuahsanin Tuipui Sen kama Saudi Arabia ram lawngchawlhna khawpui Jeddah a pan a; he khuaa an football club lian pakhat Al-Ittihad Saudi Arabian Club, a lamtawia Al-Ittihad an tih mai player a nih hnuah Jeddah mipuiin French forward an bawr nasa hle.
Karliamta Nilaini daih tawh khan Saudi champion Al-Ittihad chuan thuchhuah siamin, Jeddah khawpuia an home King Abdullah Sports City Stadium-a Benzema lawmluh leh phochhuahna hun chhim turin ticket an zawrhchhuah atanga darkar reilote hnuah ticket 56,000 chuang an hralh zo nghal der tih an sawi!
France striker leh Ballon d’Or winner ni bawk hian karliamta Thawhlehni khan Saudi Pro League club tana season thum khel turin contract hmui zet a ziak fel a, tualchhung media-te tarlan danin kum thum chhung hian US dollar maktaduai 165 tehreng a hlawh dawn!
India pawisain kum khat chhunga Benzema hlawh thar tur hi an chhutchhuak chhin a, cheng vaibelchhe 1765 (Rs. 1765 crores) tehreng a tling!
Thla khatah cheng vaibelchhe 147 a hlawh tling dawn a, a ni khat hlawh chu cheng vaibelchhe 4.9 niin, minute tin cheng 34,008 hlawh zel ang a ni dawn!
Karliamta Ningania Real Madrid captain hlui an lawmluhna khelmual kha tualchhung mite chuan ‘The Shining Jewel’ tiin an sawi a, thutna (seat) 62,000 awmin, player thar phochhuahna ticket man tlawm ber kha an ram pawisain riyal kua a ni a, chu chu USD 2.40 nena inhen a ni.
Kha huna Al-Ittihad supporter tam zawkin yellow and black colours thuam an inbel a, Jeddah mipui an sahawk a ni ber!
Kum 35 mi Benzema kha kum 2009 hnu lama league title an lak leh vawikhatna hnu lama an player sengluh hmasakber niin, N’Golo Kante pawh Chelsea atangin an beisei zui leh bawk.
Tarlan tawh thin angin, nikum December thla mai khan football superstar Cristiano Ronaldo pawhin Saudi Pro League khel turin Al Nassr FC, a tawi zawnga Al Nassr an tih mai, nen contract zet an ziak a; he club hi Saudi Arabia ram khawpui Riyadh-a inbun an ni.
Portuguese lo sawilawk tawh angin Saudi club-te hian sum an nei bawk a, Europe-a hming lo chher tawh thiau player uaithla lam lakluh an intihhmuh chho zel dawn niin a lang a, Sergio Busquets, Di Maria, Jordi Alba leh Sergio Ramos-te nen pawh he thlaler lalram hi sawizawm a ni .
Riyadh khaw club dang Al-Hilal Saudi Club, a awlsam zawnga Al-Hilal an tih mai pawhin sum tam mangkheng hlawh turin Argentina captain Lionel Messi an sawm hlawhchham tawh a, kum 35 mi hian Inter Miami zawmin United States lamah nun thar a hmachhawn dawn ta zawk a ni.