College/university zirlaite ABC ID siam dan zirtir

Mizoram University-a Examinations Department chuan Academic Bank of Credits /National Academic Depositry lam sawihona chu Nilaini khan an buatsaih a, pro-vice chancellor Prof. Pravakar Rath chuan a hmanpui.
MZU controller of examinations Prof. Lalnuntluanga chuan zirlaiten ABC ID an neih ngei ngei a tul tih a sawi bakah digilocker-a data (marksheet/ grade card leh certificate) an dahte awlsam takin zirlaite tan access theih a ni a, documents verification atan pawh a awlsam tih a sawi. Hei hian documents verification atana hun tam tak a lak thin chu a ti tawi thei tih sawiin, vawiin thlenga MZU hnuaia marksheet /grade card leh certificate upload tawh zat a sawi bawk.
North East Region (National e-Governance Division) state nodal coordinator Zakierheicha chuan zirtirin, National Academic Depository (NAD) leh digilocker chungchang a sawifiah a. Zirlaite tana a tangkaina leh digilocker siam dan a sawi.
Workshop-ah hian PAN leh driving licence (DL) hmanga ABC ID siam dan zirtir an ni a, live demonstration tih nghal a ni. Zirlaite PAN leh DL hmanga ABC ID siam chhin a ni, hei hian an zirlaiten PAN leh DL hmanga ABC ID siam tura harsatna neite a pui thei dawn a ni. He provision hian Aadhaar nei lote nasa takin a pui dawn bawk.
Workshop-a tel tur hian ABC/NAD coordinator leh technical person-te beisei an ni a. MZU academics department hnuaia department 41 atangin 43 an tel a; undergraduate atangin constituent & affiliated college 28 atangin 46; professional course institution 10 atangin mi 10 nen, an vaiin mi 99 an tel.
Workshop neih chhan ber chu, sawrkar laipui Ministry of Education-in India rama zirlai zawng zawngte academic bank of credit (ABC) ID nei vek tura a tih avang leh India rama zirlaite credit transfer theih tura ruahmanna a siam tihhlawhtlinna tura hmalakna a ni. India rama higher education institute-te hi NEP hmang vek tura tih an ni a, NEP hi ABC tihhlawhtlinna tura a kawng pawimawh a ni.