College zawm turin Aadhar ngai

University Grants Commission (UGC) chuan National Education Policy (NEP) 2020 zulzuiin college leh university zirlaite chu Aadhaar an neih a phut a. Mizoram University registrar chuan harsatna an tawh loh nan Aadhaar nei lote chu hma la rang turin a chah.
Zirtawpni khan Higher & Technical Education minister Dr Vanlalthlana leh MZU registrar Prof. Lalnundanga te chu an inkawm a. India rama zirna sang enkawltu UGC bakah zirna kalphung thar NEP 2020 zula Mizorama college leh university zirlaite hmakhua chungchang an sawidunnaah MZU registrar chuan a hmaa tarlan khi a sawi a ni.
UGC duh danin semester kal mek atangin zirlaite chuan Aadhaar an neih ngei a ngai tawh a. Aadhaar nena zirlaite data thlunzawm a nih loh chuan zirlaiten result an nei thei tawh dawn lo. Zirlaiten Aadhaar an neih vek a tul thu sawi niin, harsatna an tawh loh nan Aadhaar nei lote chu hma la rang turin registrar hian a chah.
NEP zula National Council for Teacher Education (NCTE) in a duan, Integrated Teacher Education Programme (ITEP) chungchang pawh sawi dunin, kum 2030 hnulamah chuan zirtirtu ni duh tan ITEP course hi zir ngei ngei a ngai dawn a. ITEP hi integrated course niin, undergraduate level-a subject specialization course leh teacher’s education course zirkawpna (dual major undergraduate degree) a ni. Hei hi sawrkarin kalpui a tum avangin zirtirtu nih tumte chuan ITEP hi zawm ngei a tul tih sawi a ni.