Colombia lirnghingah mi 250 chuang thi tawh

Chhanchhuah hna thawktute chuan Thawhlehni khan Colombia khawthlang lama lirnghing na takin a sawi avanga in chim tlusawp chhah tak takte haiin dam an zawng zui zel a, lirnghingah hian mi 250 vel thi an awm tawh.
Tun kum zabi kal meka Colombia-a lirnghing na ber, magnitude 7.4-a na hian Thawhtanni zing khan coffee chin tamna hmun atanga irh chhuakin sawi a. Apartment block, in, sikul leh damdawi in tam tak chim leh chhia a awm.
Chhiatna thlenna khawpui hrang hrang atanga report dawn khawm chinah mi 254 thi an awm tawh a. Coffee chin tamna khawpui, Pereira-ah mi 101 thi awm tawhin a tuar na ber an ni a, ram chhunga khawpui lian pathumna, Cali-ah mi 95 an thi bawk.
Lirnghing thlenna hmun bula Pacific-a ramngaw awmna hmun, Choco-a tualto hnam tam tak chu power nei lovin an awm mek a, chhanchhuah hna thawh pawh a harsat phah hle.
Lirnghing hi president thar, Abelardo De La Espriella lak luh a nih atanga ni thum hnu lekah thleng niin a nghawng hmunte a tlawh a, an chenna in chânte chu suma puihna pek a tiam.
Chhanchhuah hna thawktute chuan Thawhtanni zan leh Thawhlehni zing thleng khan crane, excavator leh an kut hmangin hna an thawk zel a, ding tlarin hnawlte chu inhlan chhawngin an thian a, a hnuaia tangte an dap mek zel a ni.
Lirnghing hian apartment complex lian tak tak a sawi chhiat avangin chenna in nei rih lo mi sang tel an awm mek a, pawn lama khawsa an awm teuh a ni.
Thawhlehni chawhnu (India-a Nilaini zing khaw var hma) thleng khan thlawhna tumhmun patghum khar a la ni a. Hmun tam tak, a bikin Choco-ah chuan gas, tui leh electricity an la nei lo va, kawngpui liante pawh la khar a ni