Commonwealth games nei thei lo mai thei

2026 Commonwealth Games chu Australian State Victoria tena budget lama harsatna an neih avangin neih theih loh mai dinhmunah a ding mek.
April 2022 daih tawh khan Victoria in tlawmngaih a chhuah hmain Commonwealth Games Federation (CGF) te chuan he games thlengtu tur hi an hmu zo tawh lo a ni.
Victoria premier chuan CGF thlen man chu a let thumin a sang tawh tia sawiin chu chu state tana harsatna zawk thlentu a ni thei dawn tlat tiin a sawi a ni.
CGF te chuan Victoria te thutlukna siam chu pawi an tih thu sawiin harsatna chinfel a nih ngei theih nana hma an lak mek thu an sawi zui bawk.
Comonwealth Games hi multi-sport tournament niin kum li dan zela thleng a ni a, World War II laia thulh tih loh kha chu thulhin a la awm ngai lo.
He games a tel tur chuan Commonwealth ram 56 mi leh sa nih a ngai a, Commonwealth te hi British Empire a tel tawh te an ni.
Victorian Premier Daniel Andrews chuan nikuma harsatna tawh a nih khan puitu nih an duh vang a nih thu sawiin mahse a hautak lutuk deuh a ni tiin a sawi.
A tirah chuan organiser ten a thlenna kaihhnawihah Australian $2.6 billion vel sen inringin chu chu State tan pawh sum lakluhna awm that theihna tura ngaih a ni.
Mahse tunah erawh ni 12 awh tur tournament thlen nan hian a tlem berah A$6 billion tal sen a ngai dawna an chhut thu Andrews chuan a sawi a, chu chu a tira an hisap dan let hnih zeta tam niin Victoria tan a harsa lutuk dawn tiin a sawi bawk a.
Victorian Opposition Leader John Pesutto chuan sorkar thutlukna siam chu State tana zahthlak a nih thu sawiin khawvel huap pawha hmingchhiatna tiin a sawi zui thung.
Chief executive of Commonwealth Games Australia chuan a thlen man tur hisap chu a tam uchuak tia sawiin kum 2026 games thleng tur Australian khawpui dang an hmuh theih a beisei thu a sawi zui thung.