Company lian nen ramngaw hman tangkai tumin indawr

Company lian nen ramngaw hman tangkai tumin indawr
Mizorama ramngawte chu company lian tak takten ‘carbon sink’ a hman a nih theihna’n indawrna a kal mek tih Environment, Forests & Climate Change minister TJ Lalnuntluanga chuan a sawi.
Green India Mission hnuaia kuthnathawktute ramngaw siam belhna tur leh suma chantir theih, rah nei chi thing phun belhna kawnga hmalakna tur ‘Agro-Forestry leh Social-Forestry’ hnuaia hamthatna awm chu Ningani khan Kolasibah sem a ni a. Hmanpuitu EF& CC minister chuan khawvel thang zela khawsak leh eizawnna avangte in ramngaw leh a chhunga nungchate nekchepna leh sik leh sa inthlak thleng buai nasa lutuk tur venna’n Green India Mission hnuaiah ramngaw awmsa humhalh leh siam belhna tur ‘Agro-Forestry leh Social-Forestry’ kaltlanga hma la turin Kolasib district-ah mi 237-in hamthatna an dawng thei dawn tih a sawi.
Minister chuan EF&CC department hmalakna in Kolasib district leh a vela ramngaw siamna tur ‘Nagar Van’ project te, Botanical Garden leh JICA kaltlangin Biodiversity Conservation & Forest Enrichment Project kalpui tur ruahman mek a nih thu te sawiin, Mizorama ramngawte chu company lian tak takten ‘Carbon Sink’ a hman a nih theihna’n indawrna a kal mek thu a sawi bawk a ni.
Kolasib DFO Margaret Lalramchhani sawi danin, Green India Mission hnuaia ‘Agro-Forestry leh Social-Forestry’ kaltlang hian mahni huan neihsaa thing humhalh leh an eizawnna kawnga pui thei tur thing rah neih chi phun belh tura hma lak chu a thil tum ber a ni a. Ramngaw siam belh kawnga thil tangkai tak tur nia rin a ni. Kolasib, Kawnpui, Bualpui leh Bairabi atangin mi 148 hnenah 1st instalment Rs. 15000 hlan an ni. A dawng tur hian an huan hectare 1-a zauah thing rah nei chi 1100 zel an phun anga, thing tiak hi EF&CC department-in a thawnin a pe. A hmunhma enkawlnan Rs. 28500 an dawng dawn a ni. Heng hmalakna te hi a bialtu range officer-ten an vilpui anga, hmalakna hmasa hian Kolasib district-a ram hectare 237 huam tura ruahman a ni.